Тошкент шаҳар Олмазор туманида ука ўз опасидан мулк улушини МИБ орқали қайтариб олди. Бу ҳақда МИБ ахборот хизмати хабар берди.
Унга кўра, Мажбурий ижро бюросининг Олмазор туман бўлими иш юритувига фуқаролик ишлари бўйича Шайхонтоҳур туманлараро судининг ижро варақасига асосан Ю.К.дан ундирувчи Г.С. фойдасига 58 миллион 730 минг сўм миқдорида мол-мулк улушидан компенсация ундириш тўғрисидаги ижро ҳужжати келиб тушган.
Қарздор опа укасига ўз ихтиёри билан мол-мулкдан улушни тўлаб бермагани сабабли мажбурий ижро ҳаракатларига киришилган. Бўлим давлат ижрочиси томонидан олиб борилган ижро ҳаракатлари натижасида Ю.К.дан мазкур пул маблағлари тўлиқ ундирилиб, ундирувчи томонидан тақдим этилган банкдаги ҳисоб рақамига ўтказиб берилди ва ижро иши амалда тамомланди.
Бундан аввал Сурхондарё вилояти Сариосиё туманида аёл танишига берган қарзини МИБ орқали қайтариб олгани ҳақида хабар берилганди. Суд унинг ҳақиқатдан унинг танишига 97 миллион 560 минг сўм қарз берганини, ушбу қарзлар йиллар давомида қайтарилмагани сабабли мажбурий тартибда ундиришни белгилаб берган.
Изоҳ (0)