Шавкат Мирзиёев ва Владимир Путиннинг телефон орқали мулоқоти бўлиб ўтди, деб хабар бермоқда Президент матбуот хизмати.
Маълум қилинишича, 21 февраль куни бўлиб ўтган телефон орқали мулоқотда давлат раҳбарлари Ўзбекистон билан Россия ўртасидаги кенг қамровли стратегик шериклик ва иттифоқчилик муносабатларини янада ривожлантириш ва мустаҳкамлашнинг долзарб масалаларини муҳокама қилди.
Россия президентининг ўтган йил май ойидаги Ўзбекистонга давлат ташрифи давомида эришилган келишувларни етакчилар томонидан тасдиқланган “йўл харитаси”га мувофиқ амалга ошириш натижалари кўриб чиқилди.
Турли даражаларда фаол давом этаётган самарали мулоқот ва алмашинувлар юксак баҳоланди. Савдо-иқтисодий ва инвестициявий ҳамкорликдаги асосий кўрсаткичларнинг ўсиш суръатини таъминлаш, шунингдек, икки мамлакат ҳудудларида саноат кооперацияси лойиҳаларини қўллаб-қувватлашга алоҳида эътибор қаратилди.
Гуманитар ҳамкорлик, энг аввало, маданият, санъат, фан, таълим, шу жумладан, муҳандис кадрларни тайёрлаш, соғлиқни сақлаш ва спорт соҳаларида кенгайиб бораётгани қайд этилди.
Президентлар халқаро кун тартибидаги масалалар юзасидан ҳам фикр алмашиб, бўлажак тадбирлар режасини муҳокама қилди.
Владимир Путин давлат ташрифи билан Ўзбекистонда 2024 йилнинг 26–28 май кунлари бўлганди. Шавкат Мирзиёев Россия президентининг давлат ташрифи ҳамкорликнинг янги даврини бошлаб берувчи тарихий воқеа деб атаганди. Ташриф давомида энергетика, шу жумладан, атом энергетикаси, қишлоқ хўжалиги, инновациялар, миграция, хавфсизлик ва бошқа соҳаларда ўзаро манфаатли ҳамкорликни ривожлантириш масалаларини атрофлича муҳокама қилинганди. Ташриф якунида бир қатор ҳужжатлар, жумладан, Ўзбекистон ва Россия ҳамкорлигининг устувор йўналишларида ҳамкорликни кенгайтириш бўйича қўшма ҳаракатлар режаси имзоланганди.
Шавкат Мирзиёев ва Россия президенти Владимир Путин музокаралар ҳамда ҳудудлар кенгаши йиғилишидан сўнг тонгги соат учгача мулоқотни давом эттирган. Шундай қилиб Путиннинг Ўзбекистонга давлат ташрифи режалаштирилганидек икки кун эмас, балки учинчи кун ҳам давом этганди.
Изоҳ (0)