Кўксарой қароргоҳида 27 май куни Шавкат Мирзиёевнинг таклифига биноан Ўзбекистонга давлат ташрифи билан келган Россия президенти Владимир Путинни расмий кутиб олишга бағишланган тантанали маросим бўлиб ўтди. Бу ҳақда Президент матбуот хизмати хабар берди.
Қароргоҳ олдидаги майдонда икки мамлакат давлат байроқлари кўтарилди ва фахрий қоровул саф тортди.
Шавкат Мирзиёев олий мартабали меҳмонни самимий қарши олиб, шоҳсупага таклиф қилди. Давлат мадҳиялари янгради. Ҳарбий оркестр садолари остида етакчилар фахрий қоровул сафи олдидан ўтиб, расмий делегациялар аъзоларини қутлади.
Биргаликда суратга тушилгандан сўнг, давлат раҳбарларининг тор доирадаги музокаралари бошланди.
Владимир Путин давлат ташрифи билан Ўзбекистонга 26 май куни келди. Тошкент халқаро аэропортида Россия президентини Шавкат Мирзиёев кутиб олди. Сўнг улар “Янги Ўзбекистон” боғига ташриф буюрди ва анъанага кўра, Россия раҳбари Мустақиллик монументига гулчамбар қўйди.
27 май куни олий даражадаги музокаралар бўлиб ўтади. Унда раҳбарлар Ўзбекистон билан Россия ўртасидаги кенг қамровли стратегик шериклик ва иттифоқчилик муносабатларини янада ривожлантириш ва чуқурлаштириш масалаларини кўриб чиқади.
Саммит якунлари бўйича икки томонлама ҳужжатлар тўплами қабул қилиниши режалаштирилган. Президентлар, шунингдек, Ўзбекистон ва Россия ҳудудлари кенгашининг биринчи йиғилишида ҳам иштирок этади. Ушбу йиғилишда иштирок этиш учун Чеченистон раҳбари Рамзан Қодиров ҳам Тошкентга келди.
Изоҳ (0)