Хоразм ва Фарғона вилоятларида ҳуқуқ-тартибот идоралари томонидан ўтказилган тезкор тадбирда транспорт бошқармаси бош мутахассиси ва Агросаноат мажмуи устидан назорат қилиш инспекцияси Ёзёвон тумани бўлими бош мутахассиси қўлга олинди.
Хоразм вилоятининг Транспорт бошқармаси бош мутахассиси тадбиркорлик фаолияти билан шуғулланувчи фуқаронинг ишончига кириб, бошқа бир фуқарога тегишли бўлган ва Урганч шаҳрида аҳолига транспорт хизматлари кўрсатишга ихтисослашган МЧЖга қарашли 960 метр квадрат бўш ер майдонини кадастр идораларидаги танишлари орқали унинг номига ўтказиб, у ерда кўп қаватли турар жой қуриши учун тегишли ҳужжатларни расмийлаштириб беришни ваъда қилган.
Эвазига 135 минг АҚШ доллари талаб қилиб, шундан 80 минг АҚШ долларини олдиндан олган вақтида ҳуқуқни муҳофаза қилувчи органлар томонидан ашёвий далиллар билан ушланган.
Ҳозирда ушбу шахсга нисбатан Жиноят кодексининг 168-моддаси тўртинчи қисми “а” банди (жуда кўп миқдорда фирибгарлик), 211-моддаси иккинчи қисми “а” банди (жуда кўп миқдорда пора бериш) билан жиноят иши қўзғатилиб, тегров ҳаракатлари олиб борилмоқда.
Ҳуқуқ-тартибот идоралари томонидан Фарғона вилоятида ўтказилган тезкор тадбирда эса Агросаноат мажмуи устидан назорат қилиш инспекциясининг Ёзёвон тумани бўлими бош мутахассиси хизмат мавқеидан фойдаланиб, “Шаффоф қурилиш” миллий ахборот тизимида пудратчи корхонанинг рейтинг балларини кўтариш ҳамда тендерга тақдим қилиш мақсадида, ҳақиқатда мавжуд бўлмаган қурилиш техникаларининг техник паспорти ва ёрлиқларини тайёрлаб бериш эвазига 8700 АҚШ доллари олган вақтида ашёвий далиллар билан ушланган.
Ҳозирда унга нисбатан Жиноят кодексининг 168-моддаси иккинчи қисми “в” банди (хизмат мавқейидан фойдаланган ҳолда фирибгарлик) ва 211-моддаси (пора бериш) билан жиноят иши қўзғатилиб, тергов ҳаракатлари олиб борилмоқда.
Изоҳ (0)