Тошкент шаҳридаги Президент мактаби барқарор ривожланиш бўйича Шайх Зоид ал Наҳаён номидаги нуфузли мукофотнинг “Глобал ўрта мактаблар” номинациясида ғолиб деб топилгани ҳақида хабар берилганди.
Саида Мирзиёева Президент мактаби икки нафар ўқувчисининг ота-онаси ва устозига президент номидан мукофот топширди.
“Бу ғалаба барча ёшларимиз учун умид ва илҳом рамзидир. Биз сиз билан фахрланамиз!”, деб ёзади президент ёрдамчиси.
Абу-Дабидаги тақдирлаш маросимида Шавкат Мирзиёев ҳам иштирок этган эди. Давлат раҳбари мактаб вакиллари билан учрашиб, уларни ғалаба билан табриклаганди.
Zayed Sustainability Prize экологик барқарорлик ва инсон фаровонлигига хизмат қилувчи инновацияларни рағбатлантиради. 2008 йилда БАА асосчиси Шайх Зайд бин Султон ал-Наҳаён меросини давом эттириш мақсадида таъсис этилган.
Мукофот 5 йўналишда берилади: соғлиқни сақлаш, таълим, энергия, сув ва глобал мактаблар. Ҳар бир йўналишда ғолиблар барқарорлик лойиҳалари учун молиявий ёрдам олади. Жами фонд — 3 миллион доллар.
Тошкент шаҳридаги Президент мактаби ўқувчилари 150 мактабда ёмғир сувини йиғиш бўйича лойиҳа ишлаб чиққан. Эндиликда ғолиб жамоа 150 минг доллар грант олади.
Изоҳ (0)