Андижон вилояти Марҳамат туманидаги хонадонлардан бирида газ портлади. Бу ҳақда “Дарё”га Бош прокуратура ахборот хизмати раҳбари Ҳаёт Шамсутдинов хабар қилди.
Аниқланишича, 3 январь куни соат 03:00 ларда “Шомат” МФЙда жойлашган уйда яшовчи фуқаро Х.Ш. яшаш хонадонининг ётоқхона қисмида қўлбола усулда қурилган иситиш печини ёқмоқчи бўлиб, гугурт чаққан вақтида хонага тўпланган табиий газ ва ҳаво аралашмасидан чақнаш юз берган.
Оқибатда ушбу хонада бўлган Х.Ш. танасининг 90 фоиз, турмуш ўртоғи Л.Ш. танасининг 35-40 фоиз, ўғли Ж.Х. танасининг 20-30 фоиз, қизи Х.Х.нинг танасининг 70 фоиз қисми куйиш ташхиси билан туман шошилинч тез тиббий ёрдам бўлимига ётқизилган.
Ҳодиса жойига туман прокурори, туман прокуратураси терговчиси, туман ИИБ бошлиғи, туман Фавқулодда вазиятлар бўлими, Марҳамат туман газ таъминоти филиали масъул шахслари ва тезкор тергов гуруҳи чиқиб процессуал ҳужжатлар расмийлаштирилган.
Кейинчалик жабрланган аёл ва унинг қизи Республика шошилинч тез тиббий ёрдам илмий амалий марказига олиб келинган. Тиббий муолажаларга қарамасдан қиз 4 январь куни вафот этган.
Терговга қадар текширув ҳаракатларини ҳар томонлама, тўлиқ ва сифатли олиб борилишини таъминлаш мақсадида туман прокуратураси томонидан жабрланувчиларга нисбатан суд-тиббий экспертизаси тайинланган. Ҳозирда ҳолат юзасидан туман прокуратураси томонидан терговга қадар текширув ҳаракатлари давом эттирилмоқда.
Бундан аввал Бухорода хонадонларнинг бирида газ портлаши оқибатида икки киши вафот этганди. Тошкент вилоятидаги корхонада газ портлаши оқибатида 1 нафар фуқаро вафот этган, 6 нафар фуқаро тан жароҳати олиб, шифохонага ётқизилганди.
2024 йил ноябрь ойида эълон қилинган маълумотга кўра, йил бошидан буён газ билан боғлиқ 74 та ҳолат содир бўлган. Бунинг оқибатида 82 киши вафот этган, 80 киши турли даражадаги тан жароҳатлари олган.
Изоҳ (0)