Жанубий Калифорнияда жарроҳлар илк марта инсон қовуғини кўчириб ўтказишга муваффақ бўлди. Бу ҳақда The New York Times хабар берди.
Операция май ойи бошида Калифорния университети ва Жанубий Калифорния университетининг икки жарроҳи томонидан амалга оширилган. Унда қовуқ саратонининг камдан-кам учрайдиган турига чалинган 41 ёшли эркак иштирок этган.
Мен вақти келганда портлайдиган бомба эдим. Лекин энди умидим бор, дейди бемор Оскар Ларраинзар.
Шифокорлар қовуқ сиғими ва кўчириб ўтказишдаги асоратлар ҳақида маълумот олиш учун клиник синов доирасида яна 4 нафар беморга қовуқ трансплантациясини амалга оширмоқчи. Сўнгра бу усулни кенг қўллаш учун катта тадқиқотга ўтиш режалаштирилган. Бу сийдик пуфаги билан боғлиқ оғир касалликлардан азият чекаётган беморлар учун умид уйғотувчи янгилик ҳисобланади.
Ҳозиргача қовуғи олиб ташланган беморларда пешоб чиқаришни таъминлаш учун ичакнинг бир қисмидан фойдаланиб келинган. Баъзиларига қорин бўшлиғи ташқарисида жойлашган махсус халтачага пешоб йиғиладиган ёнбош ичак найчаси (илеал кондуит) ўрнатилади. Бошқаларга эса тананинг ички қисмига ўрнатиладиган ва пешоб йўлига уланадиган сунъий қовуқ — неоқовуқ қўйилади.
Бироқ доктор Индербир Гиллнинг таъкидлашича, ичак тўқимаси кўплаб бактериялар билан тўла бўлгани боис “табиатан ифлосланган” ҳисобланади. Уни пешоб йўллари каби “стерил” ҳудудга киритиш беморларнинг 80 фоизигача бўлган қисмида турли асоратларга сабаб бўлмоқда. Бу асоратлар орасида электролитлар мувозанатининг бузилиши, буйрак фаолиятининг аста-секин сусайиши ва ҳазм муаммолари ҳам мавжуд.
Изоҳ (0)