Ижтимоий ҳимоя миллий агентлиги томонидан 26 майда миллий конференция ўтказилиб, унда болаларни зўравонликдан ҳимоя қилиш бўйича 10 йиллик стратегия ва ҳаракатлар режаси тақдим этилади.
Агентлик матбуот хизматининг хабар қилишича, “Мажбуриятдан ҳаракатга: болаларга нисбатан зўравонликка барҳам бериш бўйича стратегия ва миллий истиқболлар” номли конференцияда БМТ, UNICEF, халқаро ташкилотлар ҳамда фуқаролик жамияти институтлари вакиллари иштирок этади.
“Келинг, биргаликда шундай тизим яратайликки, ҳар бир бола ўзини ҳимоя остида, эътибор ва меҳр-муҳаббат қамровида ҳис эцин”, дейди Шаҳноза Мирзиёева
2025 йил 15 майдан бошлаб Ўзбекистонда “Болаларни зўравонликнинг барча шаклларидан ҳимоя қилиш тўғрисида”ги қонун кучга кирганди. Миллий конференция қонунни амалга ошириш доирасида ўтказилади.
“Болаларни зўравонликнинг барча шаклларидан ҳимоя қилиш тўғрисида”ги қонун 2024 йил 31 майда Қонунчилик палатаси томонидан қабул қилиниб, 15 августда Сенат томонидан маъқулланганди. У 5 боб ва 51 моддадан иборат. Қонунда давлат болаларни зўравонликнинг барча шаклларидан ҳимоя қилиш учун тегишли ҳуқуқий, маъмурий, ижтимоий, иқтисодий ва бошқа чораларни кўриши, зўравонликдан жабрланувчиларни реабилитация қилиши ва уларнинг ҳуқуқларини тиклаши ҳамда уларни ижтимоий мослаштириш учун зарур бўлган самарали чоралар кўриши белгиланган.
2025 йил 9 апрелда Тошкентда болаларни зўравонликдан ҳимоя қилиш бўйича муҳим халқаро мулоқот бўлиб ўтганди. Муҳокамалар марказида “Болаларни ҳар қандай зўравонлик шаклларидан ҳимоя қилиш тўғрисида”ги янги қонунни жорий этиш масаласи бўлди.
Изоҳ (0)