Тошкент шаҳрида “Б.С” МЧЖга қарашли савдо шохобчаларда тегишли ҳужжатлари бўлмаган турли номдаги тамаки ва электрон тамаки маҳсулотлари сотувга қўйилганлиги аниқланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Ушбу савдо нуқталаридан умумий баҳоси қарийб 12 млрд сўмлик 144 567 қути тамаки, шундан 56 225 дона электрон тамаки, 25 714 дона электрон тамаки суюқликлари, 10 668 дона электрон тамаки чекиш ускунаси ҳамда 3 800 дона калян ашёвий далил сифатида олинган.
Ушбу тамаки маҳсулотларининг келиб чиқиш манбасини аниқлаш мақсадида давом этган тезкор тадбирда, Тошкент вилоятининг Қибрай тумани, “Хайдаробод” МФЙ ҳудудидаги нотурар бинода 3 нафар фуқаро электрон тамаки маҳсулотларини ишлаб чиқарувчи яширин цех ташкил этгани фош этилди.
Цех кўздан кечирилганда, умумий баҳоси 500 млн сўмлик яъни 2 175 дона электрон тамаки суюқликлари, 2 дона 250 килограммлик идишда глицерин ва гликол кислотасига ўхшаш суюқликлар, турли номдаги 42 та ўрамда электрон тамаки ёрлиқлари, электрон тарози, турли ҳажмдаги ўлчов идишлари, ҳуш бўй таъм берувчи ароматизаторлар, қадоқлаш ускуналари, 567 дона тайёр электрон тамаки ва ишлаб чиқаришда фойдаланилган бошқа товар моддий бойликлари ашёвий далил сифатида олинган.
Мазкур ҳолат юзасидан Жиноят кодексининг 179-моддаси (сохта тадбиркорлик) ва 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда муомалага киритиш ёки ишлаб чиқариш) билан жиноят иши қўзғатилиб, тергов ҳаракатлари ўтказилмоқда.
Сенат 2022 йилнинг июнида бўлиб ўтган ялпи мажлисида “Алкоголь ва тамаки маҳсулотларининг тарқатилишини ҳамда истеъмол қилинишини чеклаш тўғрисида”ги қонунни бир қанча асослар сабаб рад этганди.
Соғлиқни сақлаш вазирлиги томонидан 2024 йилнинг апрель ойида бир қатор тамаки ва никотин маҳсулотлари, электрон сигареталар муомаласини тақиқловчи, шунингдек, бу соҳада жавобгарлик жорий этишни назарда тутувчи қонун лойиҳаси муҳокама учун эълон қилганди.
Унда никотин ва тамаки маҳсулотларининг “замонавий” ёки “инновацион” турлари, хусусан никотин етказиб беришнинг электрон тизимлари, улар учун суюқликлар, геллар, шу жумладан электрон сигареталар ҳамда тамакини қиздириш тизимлари, қиздириладиган тамаки маҳсулотлари Ўзбекистонга кириб келиши ва аҳоли, айниқса болалар ва ёшлар орасида уларни чекиш кескин кўпайгани қайд этилганди.
2021—2023 йилларда Ўзбекистонга қиймати 28,5 млн долларлик 5,4 млн дона электрон сигареталар импорт қилинган бўлиб, бу кўрсаткич аввалги йилларга (2018—2020 йилларда 349 минг долларлик 182 минг дона электрон сигареталар импорт қилинган) нисбатан кескин равишда – 80 бараварга ошган.
Изоҳ (0)