Мавритания суди мамлакатнинг собиқ президенти Муҳаммад ал-Абдулазизни коррупция иши бўйича 15 йиллик қамоқ жазосига ҳукм қилди. Бу ҳақда Sahara Medias нашри хабар бермоқда.
2023 йил декабрида Абдулазиз пул ювиш ва ноқонуний бойлик орттириш айблови билан беш йилга озодликдан маҳрум этилган эди. Мавританиянинг собиқ президенти бу қарор устидан апелляция берган. 14 май куни Абдулазиз ва унинг бир нечта ёрдамчилари иштирок этган апелляция суди мажлиси бўлиб ўтди.
“Апелляция судининг жиноят ишлари бўйича палатаси чоршанба куни собиқ президент Муҳаммад ал-Абдулазизни 15 йиллик қамоқ жазосига ҳукм қилди”, дейилади нашр хабарида.
Шунингдек, суд собиқ президентнинг куёвига ҳам икки йиллик қамоқ жазоси тайинлаган.
“Собиқ президентнинг ҳимоя гуруҳи ҳукм устидан Олий судга шикоят қилиши кутилмоқда”, деб ёзади нашр.
Муҳаммад ал-Абдулазиз 2009-2019 йилларда Мавритания президенти бўлган. Унга қарши тергов 2020 йилда бошланган бўлиб, мамлакатнинг собиқ раҳбарига ҳокимият ва хизмат мавқейини суиистеъмол қилиш ҳамда даромадларни яшириш каби бир нечта моддалар бўйича айблов қўйилган.
2023 йилнинг декабрида собиқ президент беш йиллик қамоқ жазосига ҳукм қилинган эди. Апелляцияни кўриб чиқиш 2024 йил 13 ноябрда бошланган.
Қўшимча қилинишича, суд Абдулазизнинг мол-мулкини мусодара қилиш ва уни фуқаролик ҳуқуқларидан маҳрум этиш тўғрисидаги қарорни ҳам ўз кучида қолдирган.
1978 йилдан 2008 йилгача Мавритания бир нечта давлат тўнтаришларини бошдан кечирган. 2019 йилда илк бор сайловлар натижасида ҳокимият бир президентдан бошқасига ўтган. Ўшанда овоз беришда ҳозирги кунда ҳам ҳокимият тепасида турган Муҳаммад ал-Ғазвоний ғалаба қозонган эди.
Тбилиси шаҳар суди Грузия собиқ президенти Михаил Саакашвилини давлат маблағларини ўта йирик миқдорда ўзлаштиришда айбдор деб топди ва уни тўққиз йилга озодликдан маҳрум қилганди.
Изоҳ (0)