Венеция биенналесида 8 май куни Ўзбекистон Миллий павильонининг расмий очилиши ва қабул маросими бўлиб ўтди. Бу ҳақда Саида Мирзиёева хабар қилди.
Бу йил Тошкентнинг ёнгинасида жойлашган “Қуёш” геомажмуаси ғоясини ўзимиз билан олиб келдик. Павильонимиз мавзуси ўзида муҳандислик фанлари, шаҳаршунослик, биология ва сунъий интеллектни бирлаштирган ва “Интеллигенс. Табиий. Сунъий. Коллектив” дея номланган биеннале мавзусига тўла мос келади, деб ёзди президент ёрдамчиси.
Саида Мирзиёева ноёб “Қуёш” объектининг ролини қайта кўриб чиқишни таклиф этди. Уни нафақат сақлаб қолиш, балки глобал ва илмий мунозараларга киритиш кераклигини қайд этди.
Бу Венеция биенналесидаги бешинчи экспозициямиз. Ҳар сафар биз она юртимизнинг кўз илғамас қадриятларини, тарихга эҳтиром, илм-фанга бўлган муҳаббатини кўрсатиб, жаҳон ҳамжамиятини ҳайратга солишда давом этамиз, дейди у.
Президент ёрдамчиси ушбу лойиҳага ўз куч-ғайрати, ижоди ва Ўзбекистонга бўлган муҳаббатини бахш этган жамоага миннатдорчилик билдирди.
-28zHyLZN.avif)
Ўзбекистон Венеция биенналесида сўнгги йилларда фаол иштирок этиб, ўзининг бой маданий ва меъморий меросини халқаро майдонда намойиш этмоқда. 2021 йилда Ўзбекистон ўзининг “Маҳалла: шаҳар ва қишлоқ ҳаёти” деб номланган миллий лойиҳасини тақдим этди. 2022 йилда Ўзбекистон Венеция замонавий санъат биенналесида иштирок этди. 2023 йилда XVIII Халқаро Венеция меъморчилик биенналеси кўргазмасида Ўзбекистон миллий павильони очилди. 2024 йил апрелида анъаналар билан технологиялар ўртасидаги боғлиқлик ҳақида ҳикоя қилувчи Don’t Miiss the Cue кўргазмаси тақдим этилди.
Изоҳ (0)