Тошкентда In-Fin-Story Invest ва Credit House компаниялари мансабдорларига нисбатан жиноий иши қўзғатилди. Уй-жойни муддатли тўлов асосида таклиф қилган икки компания иши бўйича 800 нафар фуқаро жабрланувчи деб топилди, етказилган зарар миқдори 209 миллиард сўмдан ошган.
Ички ишлар вазирлиги матбуот хизмати хабарига кўра, Тошкент шаҳрида кўп қаватли уйларни шартнома асосида муддатли тўловга сотиш билан шуғулланган In-Fin-Story Invest ва Credit House МЧЖ мансабдорларига нисбатан жиноий иш тергов департаменти томонидан иш юритувга олинган.
Мазкур жиноят иши доирасида 800 нафар фуқаро жабрланувчи деб топилган. Умумий зарар миқдори 209 миллиард 263 миллион сўм деб баҳоланмоқда. Иш бўйича айбланувчи сифатида 5 кишига нисбатан айблов эълон қилинган, тергов ҳаракатлари давом этмоқда.
Ҳозирда ички ишлар вазири ўринбосари раҳбарлигида, соҳага оид мутахассисларни жалб қилган ҳолда Махсус тезкор штаб ташкил этилган. У жабрланган фуқароларнинг мурожаатларини қабул қилмоқда.
Маълумот учун, 2018 йилдан бери In-Fin-Story Invest ва Credit House компаниялари Тошкент аҳолиси билан 10 йилгача муддатли тўлов асосида уй-жой олиш бўйича шартномалар тузган. Дастлаб шартлар жозибадор бўлиб кўринган ва мажбуриятлар бажарилган. Бироқ кейинчалик мижозлардан тушган маблағлар воситачилар орқали ишлаган қурилиш компанияларига тўлиқ ўтказилмагани аниқланган. Умумий ҳисоблаганда, компаниялар 28 та қурувчи ташкилот билан шартнома имзолаган.
Мазкур ҳолат юзасидан Ўзбекистон Республикаси Жиноят кодексининг 168-моддаси 4-қисми “а” банди (жуда катта миқдорда фирибгарлик) бўйича жиноий иш қўзғатилган.
Изоҳ (0)