Ҳиндистон расмийлари 7 майга ўтар кечаси Покистондаги, шунингдек, Кашмирнинг Покистон қисмидаги “террорчилик” инфратузилмасига ҳужум қилиб, “Синдур” операциясини бошлаганини эълон қилди.
Ҳиндистон Мудофаа вазирлиги баёнотига кўра, армия Покистондаги 9 та объектга зарба берган. Уларнинг ҳаракатлари “аниқ, вазмин ва эскалацияга йўналтирилмаган” бўлган. Ҳужумда “Покистон қуролли кучларининг бирорта ҳам объекти нишонга олинмагани” айтилган. Зарбалардан сўнг Ҳиндистон армиясининг Х ижтимоий тармоғидаги саҳифасида “Адолат тантана қилди” деган пост эълон қилинган.
Покистон армияси зарбалар террорчиларга эмас, балки тинч аҳоли яшайдиган ҳудудларга берилганини маълум қилган. Мамлакат ҳаво ҳудудини 48 соатга ёпган. Ҳиндистон ҳужуми оқибатида камида 8 киши ҳалок бўлган, 35 киши жароҳатланган.
Покистон бош вазири Шаҳбоз Шариф буни “уруш акти” деб атаган ва Ҳиндистонга жавоб қайтаришга ваъда берган.
Маккор душман Покистоннинг бешта нуқтасига қабиҳона зарба берди. Покистон тегишли жавоб беришга тўлиқ ҳақли ва бу тегишли жавоб аллақачон берилмоқда, деган бош вазир.
Мазкур баёнот фонида Покистон Ҳиндистонга жавоб зарбасини йўллаган. Покистон ахборот вазири Аттаулла Тарар бешта қирувчи самолёт ва битта дрон уриб туширилганини таъкидлаган.
Бундан ташқари, Ҳиндистон қуролли кучлари бригадасининг штаби ва Кашмирдаги ажратувчи чизиқ бўйлаб жойлашган ҳинд пости йўқ қилингани маълум қилинган. Ҳиндистон армияси эса бу баёнотларни тасдиқламаган.
Покистон ва Ҳиндистон муносабатлари
22 апрель куни Кашмирнинг Паҳалгам ҳудудида юз берган террорчилик ҳужуми оқибатида 26 киши ҳалок бўлди. Қуролли шахслар маҳаллий аҳоли ва сайёҳларга қарата ўт очди. Ҳиндистон Покистонни бу ҳужумни қўллаб-қувватлашда айблади. Покистон мазкур даъвони рад этиб, текширув ўтказишни талаб қилди.
Ҳиндистон Покистон билан 1960 йилдаги Ҳинд сувлар тўғрисидаги шартномани тўхтатиб, чегара бўйлаб сув оқимини тўхтатиб қўйди. Покистон бу уруш очишга тенг эканини билдирди. Мамлакат Ҳиндистон билан дипломатик ва савдо алоқаларини чеклади, ҳаво майдонини ёпди ва савдо алоқаларини тўхтатди.
Чегара бўйлаб кичик қуролли тўқнашувлар ва ракета синовлари кўпайди. Покистон қисқа масофали Фатаҳ ракетасини синовдан ўтказди, Ҳиндистон эса хавфсизлик машғулотларини кучайтирди Халқаро ҳамжамият, жумладан Қўшма Штатлар, томонларни зиддиятни эскалация қилмасликка чақириб, дипломатик каналларни тиклашга чақирганди.
Изоҳ (0)