Hindiston rasmiylari 7-mayga o‘tar kechasi Pokistondagi, shuningdek, Kashmirning Pokiston qismidagi “terrorchilik” infratuzilmasiga hujum qilib, “Sindur” operatsiyasini boshlaganini e’lon qildi.
Hindiston Mudofaa vazirligi bayonotiga ko‘ra, armiya Pokistondagi 9 ta obyektga zarba bergan. Ularning harakatlari “aniq, vazmin va eskalatsiyaga yo‘naltirilmagan” bo‘lgan. Hujumda “Pokiston qurolli kuchlarining birorta ham obyekti nishonga olinmagani” aytilgan. Zarbalardan so‘ng Hindiston armiyasining X ijtimoiy tarmog‘idagi sahifasida “Adolat tantana qildi” degan post e’lon qilingan.
Pokiston armiyasi zarbalar terrorchilarga emas, balki tinch aholi yashaydigan hududlarga berilganini ma’lum qilgan. Mamlakat havo hududini 48 soatga yopgan. Hindiston hujumi oqibatida kamida 8 kishi halok bo‘lgan, 35 kishi jarohatlangan.
Pokiston bosh vaziri Shahboz Sharif buni “urush akti” deb atagan va Hindistonga javob qaytarishga va’da bergan.
Makkor dushman Pokistonning beshta nuqtasiga qabihona zarba berdi. Pokiston tegishli javob berishga to‘liq haqli va bu tegishli javob allaqachon berilmoqda, degan bosh vazir.
Mazkur bayonot fonida Pokiston Hindistonga javob zarbasini yo‘llagan. Pokiston axborot vaziri Attaulla Tarar beshta qiruvchi samolyot va bitta dron urib tushirilganini ta’kidlagan.
Bundan tashqari, Hindiston qurolli kuchlari brigadasining shtabi va Kashmirdagi ajratuvchi chiziq bo‘ylab joylashgan hind posti yo‘q qilingani ma’lum qilingan. Hindiston armiyasi esa bu bayonotlarni tasdiqlamagan.
Pokiston va Hindiston munosabatlari
22-aprel kuni Kashmirning Pahalgam hududida yuz bergan terrorchilik hujumi oqibatida 26 kishi halok bo‘ldi. Qurolli shaxslar mahalliy aholi va sayyohlarga qarata o‘t ochdi. Hindiston Pokistonni bu hujumni qo‘llab-quvvatlashda aybladi. Pokiston mazkur da’voni rad etib, tekshiruv o‘tkazishni talab qildi.
Hindiston Pokiston bilan 1960-yildagi Hind suvlar to‘g‘risidagi shartnomani to‘xtatib, chegara bo‘ylab suv oqimini to‘xtatib qo‘ydi. Pokiston bu urush ochishga teng ekanini bildirdi. Mamlakat Hindiston bilan diplomatik va savdo aloqalarini chekladi, havo maydonini yopdi va savdo aloqalarini to‘xtatdi.
Chegara bo‘ylab kichik qurolli to‘qnashuvlar va raketa sinovlari ko‘paydi. Pokiston qisqa masofali Fatah raketasini sinovdan o‘tkazdi, Hindiston esa xavfsizlik mashg‘ulotlarini kuchaytirdi Xalqaro hamjamiyat, jumladan Qo‘shma Shtatlar, tomonlarni ziddiyatni eskalatsiya qilmaslikka chaqirib, diplomatik kanallarni tiklashga chaqirgandi.
Izoh (0)