Бош вазир ўринбосари Жамшид Хўжаев бошчилигидаги Ўзбекистон делегацияси Тбилиси шаҳрида ўтказилган Осиё тараққиёт банки Бошқарувчилар кенгашининг йиғилишида иштирок этди. Бу ҳақда Инвестициялар, саноат ва савдо вазирлиги матбуот хизмати хабар берди.
Тадбир доирасида инвестициялар, саноат ва савдо вазири ўринбосари Хуррам Тешабаев ва ОТБнинг Марказий ва Ғарбий Осиё бўйича бош директори Евгений Жуков умумий қиймати 3,5 миллиард долларлик 2025—2027 йилларга мўлжалланган дастурни амалга ошириш бўйича меморандумни имзолади.
Дастурда ҳар икки томон учун ҳам манфаатли бўлган ва “Ўзбекистон – 2030” стратегиясида белгиланган вазифаларга мувофиқ бўлган лойиҳалар ўрин олган.
Ўзбекистон Осиё тараққиёт банкига 1995 йилда аъзо бўлган. 1998 йилда ОТБнинг Ўзбекистондаги ваколатхонаси очилган. Банк томонидан Ўзбекистон суверен портфелига тақдим этган маблағларнинг умумий ҳажми 12 миллиард долларга етади. Ўтган йили Осиё тараққиёт банки 4 та суверен лойиҳа ва 2 та дастурга 6 та кредит ва 1 та грант ажратган.
Эслатиб ўтамиз, ўтган йили сентябрь охирларида Осиё тараққиёт банки (ОТБ) Ўзбекистоннинг 2023 ва 2024 йил учун иқтисодий ўсиш прогнозини яхшилаганди. Ундан аввалроқ эса ОТБ Ўзбекистон энергия тақсимлаш тизимини рақамлаштиришга 200 млн доллар қарз ажратиши маълум бўлган эди.
Изоҳ (0)