Bosh vazir o‘rinbosari Jamshid Xo‘jayev boshchiligidagi O‘zbekiston delegatsiyasi Tbilisi shahrida o‘tkazilgan Osiyo taraqqiyot banki Boshqaruvchilar kengashining yig‘ilishida ishtirok etdi. Bu haqda Investitsiyalar, sanoat va savdo vazirligi matbuot xizmati xabar berdi.
Tadbir doirasida investitsiyalar, sanoat va savdo vaziri o‘rinbosari Xurram Teshabayev va OTBning Markaziy va G‘arbiy Osiyo bo‘yicha bosh direktori Yevgeniy Jukov umumiy qiymati 3,5 milliard dollarlik 2025—2027-yillarga mo‘ljallangan dasturni amalga oshirish bo‘yicha memorandumni imzoladi.
Dasturda har ikki tomon uchun ham manfaatli bo‘lgan va “O‘zbekiston – 2030” strategiyasida belgilangan vazifalarga muvofiq bo‘lgan loyihalar o‘rin olgan.
O‘zbekiston Osiyo taraqqiyot bankiga 1995-yilda aʼzo bo‘lgan. 1998-yilda OTBning O‘zbekistondagi vakolatxonasi ochilgan. Bank tomonidan O‘zbekiston suveren portfeliga taqdim etgan mablag‘larning umumiy hajmi 12 milliard dollarga yetadi. O‘tgan yili Osiyo taraqqiyot banki 4 ta suveren loyiha va 2 ta dasturga 6 ta kredit va 1 ta grant ajratgan.
Eslatib o‘tamiz, o‘tgan yili sentyabr oxirlarida Osiyo taraqqiyot banki (OTB) O‘zbekistonning 2023 va 2024-yil uchun iqtisodiy o‘sish prognozini yaxshilagandi. Undan avvalroq esa OTB O‘zbekiston energiya taqsimlash tizimini raqamlashtirishga 200 mln dollar qarz ajratishi ma’lum bo‘lgan edi.
Izoh (0)