Ўзбекистон олий ўқув юртлари ва касб-ҳунар коллежларининг дипломлари Германияда тан олинишига эришиш режалаштирилмоқда.
Бу масала 1 апрель куни Ўзбекистон инвестициялар, саноат ва савдо вазири ўринбосари Шоҳрух Гуламов Германиянинг таълим ва миграция соҳаси мутахассисларидан иборат делегация билан учрашувда муҳокама қилинган. Муҳокама давомида Ўзбекистон ОТМ ва коллежларини Германия Таълим вазирлигининг ANABIN ахборот базасига киритилиши кўриб чиқилган.
ANABIN (Anerkennung und Bewertung ausländischer Bildungsnachweise) — Германия Таълим ва тадқиқот вазирлигининг расмий маълумотлар базаси бўлиб, унда хорижий дипломлар ва таълим муассасаларининг тан олиниши ва баҳоланиши ҳақидаги маълумотлар бор.
Делегация таркибида Германия ҳудудий савдо-саноат палаталарининг директорлари, шунингдек, GP Günter Papenburg AG таъсисчи компанияси томонидан ташкил этилган инвестиция компаниялари раҳбарлари ҳам бўлган.
Учрашувда Ўзбекистон ёшларини илғор технологияларга ўргатиш ва кейинчалик уларни Германия корхоналарига ишга жойлаштиришни назарда тутувчи қўшма лойиҳаларни амалга ошириш, Германиялик мутахассисларга Ўзбекистонда меҳнат фаолиятини амалга ошириш учун имтиёзлар бериш каби йўналишлар бўйича ҳамкорлик масалалари ҳам муҳокама қилинган.
2024 йилнинг сентябрида ўзбекистонликлар учун Германияга миграция масаласида бир қатор енгилликлар ишлаб чиқилаётгани маълум қилинганди. Ўша йили Самарқандда бўлиб ўтган Ўзбекистон—Германия олий даражадаги музокаралари натижасида бир қатор ҳужжатлар имзоланганди. Улар орасида “Миграция ва мобиллик соҳасида ҳар томонлама шериклик тўғрисида” ҳукуматлараро битим ҳам бор эди.
Изоҳ (0)