Reuters хабарига кўра, Ҳиндистон ва Бангладеш қирғоқларига “Ремал” циклони ёпирилиши туфайли кучли ёғингарчилик юзага келди. Оқибатда камида 16 киши ҳалок бўлди ва миллионлаб аҳоли электр таъминотисиз қолди.
Қайд этилишича, ушбу табиат ҳодисаси июндан сентябргача давом этадиган муссон мавсуми арафасида Бенгал кўрфазидаги биринчи циклон бўлган. Иқлим ўзгариши туфайли қитъанинг бу қисмида бўронлар кучайган.
Якшанба куни кечки пайт тезлиги соатига 135 км га етган бўрон Бангладешнинг жанубий Монгла порти ва Ҳиндистоннинг Ғарбий Бенгалиядаги қўшни Сагар оролларини кесиб ўтган.
Бангладешда камида 10 киши ҳалок бўлди, деди табиий офатларга қарши кураш бошқармаси раҳбари Мижанур Раҳман Reuters агентлигига берган интервьюсида. Шу билан бирга, икки киши бошпаналарга яшириниш учун кетаётганда ҳалок бўлди.
“Одамлар одатда чорва моллари ва уйларини ташлаб, бошпаналарига боришни унча истамайдилар. Улар охирги дақиқагача кутишади, лекин ўшанда жуда кеч бўлади”, — деди Мижанур Раҳмон.
Агентлик маълумотларига кўра, Ҳиндистоннинг Ғарбий Бенгалия штатида тўрт киши электр токи уриши оқибатида ҳалок бўлган.
“Шунингдек, Калкутта шаҳрида бетон қулаши оқибатида бир киши, Мосуни оролида эса лойдан ясалган уй қулаши оқибатида бир киши ҳалок бўлди”, — дейилади баёнотда.
Изоҳ (0)