Туркиянинг Измир шаҳри қирғоқлари яқинида 37 нафар ноқонуний муҳожир қутқариб қолинди

Туркиянинг Измир шаҳри қирғоқларига яқин ҳудудда 26 май куни қутқарувчилар 37 нафар муҳожирни қутқариб қолган. Бу ҳақда Anadolu нашри хабар берди.

Расмийлар ҳолат Карабурун туманига тегишли сув ҳудудида юз берганини хабар қилган. Бортида муҳожирлар бўлган резина қайиқ двигатели ишдан чиқиши оқибатида денгизда қолиб кетган. Қайиқдан яқин атрофга узатилган ҳалокат сигналига жавобан Туркия қутқарув гуруҳлари ҳодиса жойига жўнаб кетган.

Қайиқдан 30 нафар ноқонуний муҳожирлар, жумладан, тўрт нафар бола қутқариб олинган. Жароҳатланган ёки ҳалок бўлганлар йўқлиги айтилган.

Чесме тумани қирғоқларида ҳам қайиқ аниқланган. Унинг ичида бўлган, қийин вазиятга тушиб қолган 7 нафар фуқаро Туркия қутқарувчилари томонидан хавфсиз ҳудудга олиб чиқилган.

Урла тумани қирғоқларида ҳам резина қайиқ аниқланган. Қутқарувчилар муҳожирлар билан боғлиқ шубҳали ҳаракатларни сезгач, полицияга хабар берган.

Соҳил хавфсизлик гуруҳлари қайиқда бўлган 29 шахсни қўшимча текширув учун ҳибсга олган. Улар орасида 8 нафар вояга етмаган шахс ҳам борлиги айтилган.

Урлада ҳибсга олинганлар текширувдан ўтказилгач озод қилинган. Улар ҳозирча вилоят миграция бошқармаси ихтиёрига топширилган.

Расмийлар муҳожирларнинг шахси ва улар келган ҳудудлар ҳақида хабар бермаган. Айрим манбалар ҳалокатга учраган қайиқлар Греция денгиз кучлари томонидан Туркия сувларига ҳайдаб юборилганини айтган.