Reuters xabariga ko‘ra, Hindiston va Bangladesh qirg‘oqlariga “Remal” sikloni yopirilishi tufayli kuchli yog‘ingarchilik yuzaga keldi. Oqibatda kamida 16 kishi halok bo‘ldi va millionlab aholi elektr ta‘minotisiz qoldi.
Qayd etilishicha, ushbu tabiat hodisasi iyundan sentyabrgacha davom etadigan musson mavsumi arafasida Bengal ko‘rfazidagi birinchi siklon bo‘lgan. Iqlim o‘zgarishi tufayli qit‘aning bu qismida bo‘ronlar kuchaygan.
Yakshanba kuni kechki payt tezligi soatiga 135 km ga yetgan bo‘ron Bangladeshning janubiy Mongla porti va Hindistonning G‘arbiy Bengaliyadagi qo‘shni Sagar orollarini kesib o‘tgan.
Bangladeshda kamida 10 kishi halok bo‘ldi, dedi tabiiy ofatlarga qarshi kurash boshqarmasi rahbari Mijanur Rahman Reuters agentligiga bergan intervyusida. Shu bilan birga, ikki kishi boshpanalarga yashirinish uchun ketayotganda halok bo‘ldi.
“Odamlar odatda chorva mollari va uylarini tashlab, boshpanalariga borishni uncha istamaydilar. Ular oxirgi daqiqagacha kutishadi, lekin o‘shanda juda kech bo‘ladi”, — dedi Mijanur Rahmon.
Agentlik maʼlumotlariga ko‘ra, Hindistonning G‘arbiy Bengaliya shtatida to‘rt kishi elektr toki urishi oqibatida halok bo‘lgan.
“Shuningdek, Kalkutta shahrida beton qulashi oqibatida bir kishi, Mosuni orolida esa loydan yasalgan uy qulashi oqibatida bir kishi halok bo‘ldi”, — deyiladi bayonotda.
Izoh (0)