Папуа-Янги Гвинеяда 25 май куни юз берган кўчки оқибатида 2000 нафардан кўпроқ киши қум остида қолиб кетган. Бу ҳақда мамлакат ҳукумати ва Миллий офатлар маркази тарқатган хабарга асосланиб, Reuters нашри хабар берди.
Ҳукумат 27 май куни 2 минг нафардан кўпроқ фуқаро қум остида қолганини тасдиқлаган. Ҳалокат содир бўлгани ҳақидаги илк маълумотларда эса 300 дан ортиқ шахс кўчки остида қолгани айтилган эди.
Миллий офатлар маркази олдинроқ БМТга юборган мактубида келтирилган рақамлар эса ҳукумат баёнотидан анча фарқ қилади. Марказ тупроқ остида қолиб ҳалок бўлганлар сонини 670 нафар атрофида деб ҳисобот тақдим этган.
Бахтсиз ҳодиса жума куни тонгида Энга вилоятидаги Маип-Мулитака ҳудудида содир бўлган эди. Ҳалокат оқибатида 4000 киши истиқомат қилган қишлоқнинг катта қисми кўмилиб қолган.
Кўчки содир бўлганидан бери орадан ўтган 72 соатдан кўпроқ вақт давомида фақат 5 та жасад топилган. Қидирув ишлари асосан белкурак, таёқ ва шу каби воситалар билан амалга оширилмоқда.
Ҳалокат нуқтаси вилоят марказидан 60 километр узоқликда жойлашгани, релеф қийинлиги ва асосий магистралнинг тўсилиб қолгани қутқарув гуруҳлари учун катта қийинчилик туғдираётгани айтилган.
Ҳукумат қутқарув ишларини жадаллаштириш учун қўшимча кучлар сафарбар қилинишини хабар берган.
Изоҳ (0)