Истиқболли лойиҳалар миллий агентлиги “Яшил облигацияларни жойлаштириш ва муомалага киритиш тартиби тўғрисидаги қоидаларини тасдиқлаш ҳақида”ги идоралараро буйруқ лойиҳасини муҳокамага қўйди.
Мазкур қоидалар “Қимматли қоғозлар бозори” ҳамда “Акциядорлик жамиятлари ва акциядорларнинг ҳуқуқларини ҳимоя қилиш тўғрисида”ги қонунларга, шунингдек, бошқа қонун ҳужжатларига мувофиқ яшил облигацияларни чиқариш, муомалага чиқариш, яшил облигациялар чиқарилишига оид ахборотларни ошкор қилиш ва ҳисобот беришга нисбатан қўлланиладиган талабларни белгилайди.
Муҳокамага қўйилган ҳужжат лойиҳаси 7 боб 28 банддан иборат:
- яшил облигацияларни чиқариш дастури;
- чиқаришни рўйхатга олишга доир талаблар;
- жойлаштирилган яшил облигациялардан келиб тушган маблағларни бошқариш;
- маблағларни тақсимлаш ҳақида ва таъсир ҳақидаги ҳисоботлар;
- маълумотларни ошкор этиш ва ҳисобдорлик;
- қоидаларни бузганлиги учун чоралар белгиланган.
Лойиҳани ишлаб чиқишда Европа Иттифоқининг қатор давлатлари (Англия, Германия, Венгрия ва бошқалар), Индонезия, Покистон ва бошқа давлатларнинг тажрибалари ўрганилган.
Эслатиб ўтамиз, 2023 йил октябрь бошларида Ўзбекистон илк бор 4,25 трлн сўм миқдоридаги яшил суверен халқаро облигациялар ҳамда 660 млн доллар миқдоридаги халқаро облигацияларни Лондон фонд биржасида жойлаштирганди. Сўмда чиқарилган суверен халқаро облигациялар МДҲ давлатлари ичида илк “яшил” суверен облигациялар ҳисобланади.
Изоҳ (0)