Istiqbolli loyihalar milliy agentligi “Yashil obligatsiyalarni joylashtirish va muomalaga kiritish tartibi to‘g‘risidagi qoidalarini tasdiqlash haqida”gi idoralararo buyruq loyihasini muhokamaga qo‘ydi.
Mazkur qoidalar “Qimmatli qog‘ozlar bozori” hamda “Aksiyadorlik jamiyatlari va aksiyadorlarning huquqlarini himoya qilish to‘g‘risida”gi qonunlarga, shuningdek, boshqa qonun hujjatlariga muvofiq yashil obligatsiyalarni chiqarish, muomalaga chiqarish, yashil obligatsiyalar chiqarilishiga oid axborotlarni oshkor qilish va hisobot berishga nisbatan qo‘llaniladigan talablarni belgilaydi.
Muhokamaga qo‘yilgan hujjat loyihasi 7 bob 28 banddan iborat:
- yashil obligatsiyalarni chiqarish dasturi;
- chiqarishni ro‘yxatga olishga doir talablar;
- joylashtirilgan yashil obligatsiyalardan kelib tushgan mablag‘larni boshqarish;
- mablag‘larni taqsimlash haqida va ta’sir haqidagi hisobotlar;
- ma’lumotlarni oshkor etish va hisobdorlik;
- qoidalarni buzganligi uchun choralar belgilangan.
Loyihani ishlab chiqishda Yevropa Ittifoqining qator davlatlari (Angliya, Germaniya, Vengriya va boshqalar), Indoneziya, Pokiston va boshqa davlatlarning tajribalari o‘rganilgan.
Eslatib o‘tamiz, 2023-yil oktyabr boshlarida O‘zbekiston ilk bor 4,25 trln so‘m miqdoridagi yashil suveren xalqaro obligatsiyalar hamda 660 mln dollar miqdoridagi xalqaro obligatsiyalarni London fond birjasida joylashtirgandi. So‘mda chiqarilgan suveren xalqaro obligatsiyalar MDH davlatlari ichida ilk “yashil” suveren obligatsiyalar hisoblanadi.
Izoh (0)