Ўзбекистон нефть ва газ импорти ҳажмини кескин оширди

Статистика агентлиги Ўзбекистоннинг 2024 йил январь–апрель ойларида нефть, газ ва электр токи экспорт-импорти бўйича маълумот берди.

Жорий йилнинг дастлабки тўрт ойида Ўзбекистон нефть ва нефть маҳсулотларидан 179,4 миллион долларлик экспортни, 788,3 млн долларлик импортни амалга оширди. 2023 йилнинг мос даврида мазкур маҳсулотлар экспорти 278,3 миллион долларга, импорти 126,8 млн долларга тенг бўлган. Бунда экспорт ҳажмининг сезиларли пасайиши, импортнинг кескин ўсиши кузатилган.

Январь–апрель ойларида мамлакат 52,3 миллион долларлик табиий газ экспортини, 462,8 миллион долларлик импортини амалга оширган. Ўтган йилнинг мос даврида экспорт ҳажми 46 миллион доллар, импорт кўрсаткичи анча паст — 3 миллион долларни ташкил этган.

Тўрт ой мобайнида республикадан аввалги даврдан сезиларли даражада  кам — 43,8 миллион долларлик электр токи экспорт қилинган. Яъни 2023 йилнинг дастлабки тўрт ойида бу рақамлар 131 миллион доллар бўлган. Жорий йил январь–апрель ойларида мамлакатга 67,8 миллион долларлик электр токи импорт қилинган. Ўтган йилги мос даврда импорт ҳажми 139,5 доллар бўлган.

Статистика агентлиги маълумотларига кўра, ҳисобот даврида республиканинг ташқи савдо айланмаси ҳажми 20,9 миллиард долларга етган. Шундан экспорт ҳажми 8,5 миллиард доллар, импорт 12,4 миллиард долларни ташкил этган. Салбий салдо миқдори — 3,9 миллиард доллар.

Таҳлил қилинишича, Ўзбекистоннинг асосий ташқи савдоси Хитой (19 фоиз), Россия (18,4 фоиз), Қозоғистон (5,9 фоиз), Туркия (4,4 фоиз) ва Корея (3,3 фоиз) мамлакатлари билан амалга оширилган.

Эслатиб ўтамиз, сўнгги йилларда мамлакатда газ қазиб олишни кўпайтириш учун юзлаб миллион долларлик лойиҳаларга маблағлар ажратилмоқда. Аммо натижа кутилганидек бўлмай, газ қазиш ҳажми камайиб бормоқда. Оқибатда газ импорти йилдан йил ўсишда давом этяпти. Масалан, 2020 йилда 50,4 млн долларлик, 2021 йилда 154,5 млн долларлик, 2022 йилда 281,9 млн долларлик газ импорт қилинган. 2023 йилда эса газ импорти ҳажми қолган йиллардагига қараганда сезиларли ошиб, 694,9 млн долларга етган. Бу йил импорт рекорд янгиланиши кутилмоқда.

Маълумот учун, жорий йилнинг январь–апрель ойларида ҳам газ қазишда сезиларли қисқариш кузатилиб, 15,3 миллиард куб метр табиий газ қазиб олинди. Ўтган 2023 йилнинг дастлабки тўрт ойида бу рақам 16,3 миллиард кубни ташкил қилган. Бир йиллик қисқариш — 964,8 миллион куб метр.