Ўзбекистон Республикаси Президенти томонидан 2014 йилнинг 19 сентябрь куни «Ахборот тизимлари ва дастурий таъминот маҳсулотларини ишлаб чиқиш соҳасига чет эл инвестициясини жалб қилиш тўғрисида»ги қарори қабул қилинди. Бу ҳақда Алоқа, ахборотлаштириш ва телекоммуникация технологиялари давлат қўмитаси матбуот маркази хабар берди.
Мазкур қарорга мувофиқ, LG CNS Uzbekistan қўшма корхонаси жорий йилнинг охирига қадар ўз фаолиятини бошлайди.
Қарорда Ўзбекистон Республикаси алоқа, ахборотлаштириш ва телекоммуникация технологиялари давлат қўмитаси, LG CNS Uzbekistan корхонаси ҳамкорликда маҳаллий дастурий маҳсулот ишлаб чиқувчиларини жалб қилган ҳолда мамлакатимизда эҳтиёж мавжуд дастурий маҳсулотларни маҳаллийлаштириши белгиланган.
LG корпорацияси томонидан 1987 йилда асос солинган LG CNS компанияси бугунга келиб ахборот технологиялари соҳасининг консалтинг, тизим ва тармоқ интеграцияси, бизнес жараёни ва ахборот технологиялари ауцорсинги, компьютер инженеринги ва бошқа қатор йўналишларда жаҳоннинг етакчи муассасаларидан бирига айланди. LG CNS айни вақтда Корея Республикасида ахборот технологиялари хизматларини кўрсатувчи энг йирик компания ҳисобланади.
Компания Корея ҳукумати ва иқтисодиёти, аҳоли турмуш тарзи ва саноатини автоматлаштиришга оид тадбирларнинг аксариятини, хусусан Корея миллий иқтисодиёт ахборот тизими, марказлашган миллий солиқ тизими, миллий патентлаштириш тизими, электрон паспорт ва фуқароларни рўйхатга олиш тизими, почта ва логистика тизими ва бошқа аҳамиятли лойиҳаларни амалга оширган.
Изоҳ (0)