Буюк Британия ва Хитойда 10 нафар аёлга дори ичириб, зўрлаган хитойлик талаба умрбод қамоқ жазосига ҳукм қилинди. Бу ҳақда CNN хабар берди.
28 ёшли Чженхао Зоуга 19 июнь куни Лондоннинг ички қироллик судида ҳукм қилинган. Судья Росина Коттеж унга муддатидан илгари шартли равишда озод қилиниш ҳуқуқига эга бўлиши учун 22 йил 227 кун қамоқда ўтириши кераклигини билдирган.
Зоу март ойида 11 та зўрлаш, 3 та воеурисм (бошқаларнинг оғриғи ёки азобини кўришдан завқланиш) ва бир қатор бошқа жиноятлар, жумладан, экстремистик порнографик тасвирларни сақлаш ва жинсий ҳуқуқбузарлик содир этиш мақсадида гиёҳванд моддаларни сақлашда айбдор деб топилган.
Унинг кўплаб қурбонлари, прокурорларнинг сўзларига кўра, гиёҳванд моддалар таъсирида ҳушсиз ва ҳимоясиз бўлган. Полицияга кўра, интернетда “Пакҳо” номини ишлатган Зоу WeChat ва танишув иловаларида хитойлик талабалар билан боғланиб, Лондон ва Хитойдаги квартираларига таклиф қилган. У қурбонларидан буюмлар, жумладан, заргарлик буюмлари ва кийимларни олиб қолгани айтилган. Буюк Британия қироллик прокуратураси Зоу жиноятларининг бир қисмини мобил қурилма ва яширин камералар ёрдамида тасвирга олганини билдирган.
Зоу Лондон университети коллежининг PhD талабаси эди. У 2024 йил январь ойида жабрланувчилардан бири полицияга мурожаат қилганидан кейин ҳибсга олинган.
Изоҳ (0)