Кеча ижтимоий тармоқларда Хоразмдаги меҳрибонлик уйида қизларни зўрлаган амалдорларга жазо ўзгаришсиз қолдирилгани ҳақида хабар тарқалди. Олий суд ахборот хизмати раҳбари Азиз Абидов “Дарё”нинг бу ҳақдаги сўровига жавобан, тармоқларда тарқалаётган ахборот нотўғри эканини билдирди. 

Тошкент шаҳар судининг жиноят ишлари бўйича судлов ҳайъати апеллясия инстанциясида ушбу жиноят иши кўриб чиқилмоқда. Айни пайтда жараён давом этяпти. Тугамади. Ҳали бу масалада суднинг на қарори ва на янги ҳукми эълон қилинди. Тармоқларда тарқалаётган ахборотлар хато ва асосланмаган, — дейди Азиз Абидов. 

Масъул судлар тўғрисидаги Қонуннинг 66-моддасига кўра, оммавий ахборот воситалари ўз хабарларида муайян иш юзасидан суд муҳокамаси натижаларини олдиндан ўзича ҳал қилиб қўйишга ҳақли эмаслигини эслатмоқда. 

Мазкур қонуннинг биз тилга олган моддасида Оммавий ахборот воситалари ўз хабарларида муайян иш юзасидан суд муҳокамаси натижаларини олдиндан ўзича ҳал қилиб қўйишга ёки судга қандай шаклда бўлмасин таъсир кўрсатишга ҳақли эмас, — дейди Азиз Абидов.

Бу ҳақда “Дарё” журналисти билан суҳбатлашган адвокатга кўра, ёпиқ суд тарзида ўтаётган жараён айни кунларда музокараларни якунлаган. Музокарада сўз олган томонлар — прокурор ва адвокатлар ҳолат юзасидан хулосаларини маълум қилган. 

Суднинг бу борада якуний фикри ҳали эълон қилинмади. Бу ҳақда ёзаётганлар ёлғон ахборот тарқатмоқда. Суд 27 сентябрь куни иш бўйича якуний хулосасини эълон қилиши кутилмоқда, — дейди адвокат.

Хоразмда оилавий болалар уйи раҳбари уч нафар вояга етмаган тарбияланувчини 10 ой давомида вилоят адлия бошқармаси ва туман фавқулодда вазиятлар бўлими бошлиқлари билан жинсий алоқада бўлишга мажбурлагани ҳақида хабар берилганди. Ўзбекистон президенти ёрдамчиси Саида Мирзиёева Хоразмдаги болалар уйининг уч нафар жабрланган қизларига хавфсизлик таъминланишига эришилганини айтганди.

Уларнинг хавфсизлиги, руҳий ва жисмоний тикланиши ҳозирда устувор масала. Шу билан бир вақтда бу каби вазиятларда ҳаракат қилиш ва энг асосийси, уларнинг олдини олиш тизимини яратиш устида ишлашимиз керак. Қонунларни қатъийлаштириш ва зўравонликка мутлақ тоқатсизлик нормаларини яратиш вақти келди. Барча даражаларда. Бу вазиятда менга умид бағишлайдиган бирдан-бир жиҳат борки, у ҳам бўлса ошкоралик ва фуқаролик жамиятининг овози. Эҳтимол, бусиз атрофда бўлаётган воқеалардан ожизларча бехабар бўлиб қолардик. Зўравонлик доим бўлган, лекин айнан ҳозир очиқлик туфайли ушбу ҳодиса ҳақида баланд овоз билан гапиряпмиз ва бунга қарши курашиш учун реал ресурсларимиз пайдо бўлди, — деганди ўшанда Саида Мирзиёева.

Болалар омбудсмани ҳам меҳрибонлик уйи қизларига нисбатан қўлланадиган ҳар қандай жинсий жиноятларга оғир жазо турларини қўллаш керак, деган позисиядалигини билдирганди. Бош прокуратура эса Хоразмда меҳрибонлик уйи қизлари зўрлангани иши бўйича протест киритганди.