Африкада чақалоқларда учрайдиган безгакни даволашнинг илк усули амалиётда қўллаш учун тасдиқланди. У бир неча ҳафта ичида қитъа мамлакатлари бўйлаб жорий этилиши кутилмоқда. Бу ҳақда BBC хабар берди.
Шу пайтгача вазни 4,5 килограммдан кам бўлган чақалоқлар ва кичик болалар учун махсус даволаш усуллари мавжуд эмас эди. Уларга каттароқ ёшлиларга мўлжалланган даво чоралари қўлланилган. Бу эса чақалоқларга катта хавф туғдирган. Жумладан, юқори дозадаги дорилар сабаб айрим гўдакларнинг жигарига шикаст етган.
Маълумотларга кўра, 2023 йилда безгак сабаб 597 мингга яқин ўлим ҳолати қайд этилган. Уларнинг деярли барчаси Африка қитъасига тўғри келади. Вафот этганларнинг 3/4 қисми беш ёшгача бўлган болалардир.
Novartis фармацевтика компанияси ишлаб чиққан янги дори муаммога ечим бериши мумкин. У Швейцария ҳукумати томонидан маъқулланган бўлиб, бир неча ҳафта ичида безгак билан касалланиш даражаси энг юқори бўлган минтақалар ва мамлакатларда қўлланилиши кутилмоқда. Компания дорини асосан нотижорат мақсадида жорий этишни режалаштирган.
Баъзи мамлакатларда Coartem Baby ёки Riamet Baby номи билан танилган дори Novartis компанияси ва Medicines for Malaria Venture (MMV) билан биргаликда ишлаб чиқилган. Улар Жаҳон банки ва Рокфеллер жамғармаси томонидан қўллаб-қувватланади.
Африканинг 8 давлати препаратни баҳолаш ва синовдан ўтказиш жараёнида иштирок этган. Шу боис айнан ушбу давлатлар мазкур доридан биринчилардан бўлиб фойдаланиш имконига эга бўлишади. MMV бош директори Мартин Фитчэтнинг айтишича, бу безгак келтириб чиқарадиган улкан инсоний йўқотишларга барҳам бериш йўлида яна бир муҳим қадамдир.
“Безгак — дунёдаги энг ҳалокатли касалликлардан бири. У айниқса болалар орасида кенг тарқалган. Аммо ресурсларни тўғри тақсимлаш ва эътибор билан бунга чек қўйиш мумкин”, деди Мартин.
Африка минтақасида 5 ёшгача бўлган болалар ўлимининг 76 фоизи айнан безгак билан боғланган.
Изоҳ (0)