Санчо, Лаутаро, Кулибали ва Балотелли. Ёз ва кузнинг амалга ошмаган энг шов-шувли трансферлари

Европанинг аксарият лигаларида ёзги трансферлар ойнаси аллақачон ёпилиб бўлди. Тўғри, коронавирус пандемияси туфайли у одатдагидан узоқроқ давом этди. Аммо шунча вақт ҳам клублар учун барча муаммоли позицияларни ёпиш учун етарли бўлмади. Бундан ташқари, худди шу пандемия сабабли юзага келган иқтисодий инқироз потенциал харидорларнинг имкониятларига сезиларли даражада таъсир кўрсатди.

Клубларнинг у ёки бу футболчини сотиб ололмаганига кўп сабаблар бор. Аммо баъзи амалга ошиши мумкин бўлган битимлар ҳақиқатда бошқаларидан ажралиб турарди. Улар ҳақида кўп гапирилди: инсайдерлар ҳар куни ўз обуначиларини янги маълумотлар билан «боқиб» турди, мухлислар эса ўз жамоаларига келадиган янги ўйинчиларнинг ютуқ ва камчиликларини муҳокама қилди. Бироқ якунда узоқ кутилган трансферларнинг аксарияти гаплигича қолиб кетди. Демак, қуйида ёзнинг (+куз) амалга ошмаган энг шов-шувли трансферлари ҳақида фикр юритилади.

Жейдон Санчо «Боруссия Дортмунд»

Даъвогар: «Манчестер Юнайтед»

Санчо ушбу рўйхатда ҳақли равишда биринчи бўлиши керак. Боиси унинг «Манчестер Юнайтед»га ўтиши эҳтимоли бутун ёз давомида муҳокама қилинди. Аммо инглизнинг ватанига қайтиши рўй бермади. «Қизил иблислар» бир неча ой давомида «арилар» билан музокара олиб борган бўлишига қарамай, «Боруссия» 20 ёшли вингерини 120 миллион евродан камига қўйиб юбормайман деб туриб олди. Манчестерликлар эса Санчо учун максимум 80 миллион тўлашга тайёр эканини айтди. Шу тариқа келишув барбод бўлди, аммо манкунианликлар таслим бўлишни истамаяпти, улар январь ойида яна Санчо трансфери борасидаги ишни тиклаш ниятида.

Мемфис Депай «Лион»

Даъвогар: «Барселона»

Роналд Куман каталон клубини қабул қилиб олганидан кўп ўтмай, «Барселона» Депай билан алоқаларни бошлади. Мемфиснинг «Лион»дан кетиши ҳақида жуда кўп гаплар бўлди. Ҳатто унинг ўзи ҳам очиқчасига жон деб Каталонияга йўл олмоқчилигини айтди. Аммо у вазият қурбонига айланди: «кўк-анорранглилар» ғазнасида нидерландиялик учун шунчаки пул йўқ эди. Трансфер ойнасининг сўнгги кунларида «Лион» ҳатто «Барселона»га ён босиб, уни арзонроқ беришга ҳам розилик билдирди. Бироқ Бартомеу бошчилигидаги раҳбарият Куманнинг талабини қондира олмади. Ҳозирда клубларнинг қишда яна музокараларни бошлаши кутилмоқда. Депайнинг «Лион» билан шартномаси якунланишига эса 1 йил қолди ва у бу келишувни узайтириш ниятида эмас.

Уссем Ауар «Лион»

Даъвогар: «Арсенал»

Бир неча кун олдин Францияни тарк этиши мумкин бўлган «Лион»нинг яна бир футболчиси Ауар эди. «Арсенал» Лига 1 вакиллари билан узоқ вақт музокара олиб борди, аммо томонлар сўнгги паллагача нарх борасида келиша олмади. Французлар 22 ёшли ярим ҳимоячи учун энг камида 50 миллион евро талаб қилган бўлса, «канонирлар» 40 миллиондан кўп бермаслигини айтди. Бу вазиятда «Лион» ён беришни хоҳламади ва бунга тўла ҳақли эди. Депайдан фарқли ўлароқ Ауарнинг клуб билан шартномаси яна 3 йил давомида амалда бўлади. Бундан ташқари, Уссем француз клуби тарбияланувчиси ҳисобланади, «тўқувчилар» эса ҳар доим ўз футболчиларини қадрлаб келган. Даставвал футболчининг «Арсенал» билан шахсий шартнома борасида келишиб олгани айтилди, бироқ якунда айнан унинг ўзи «Лион»да қолишини маълум қилди.

Эрик Гарсия «Манчестер Сити»

Даъвогар: «Барселона»

Ёзда «Барселона» янги марказий ҳимоячи излай бошлади ва 19 ёшли Гарсия вариантида тўхталишга қарор қилди. Испаниялик футболчи «Барселона» академияси тарбияланувчиси ҳисобланади, аммо ҳозирда «Манчестер Сити» шарафини ҳимоя қилмоқда. Каталонияликлар футболчи учун бонуслар билан бирга 18 миллион евро таклиф қилди. «Шаҳарликлар» эса «бор-йўғи» яна 2 миллион қўшишни талаб қилди. «Барселона»га мана ушбу 2 миллион шу даражада кўплик қилдики, деярли ҳал бўлган трансферни ҳам амалга ошира олмади. Гарсиянинг амалдаги шартномаси келаси мавсумга бориб ўз ниҳоясига етади. Агар «Сити» Гарсияни текинга қўйиб юборишни истамаса, қишда бошқачароқ йўл тутиши керак бўлади.

Лаутаро Мартинес «Интер»

Даъвогар: «Барселона»

«Барселона» бир йилдан ошиқ вақт давомида «Интер» ҳужумчиси Лаутаро Мартинесни ўз таркибига жалб қилишга уринди. Бироқ «нерадзурри» футболчини фақат 111 миллион еврогагина қўйиб юборишини маълум қилди. Аввалига «Барселона» футболчи учун ушбу маблағни тўлашни хоҳламади, кейинчалик эса (пандемиядан кейин) тўлашга қурби етмай қолди. Маълум бўлишича, «кўк-анорранглилар» миланликларга ўз футболчилари қўшилган бир нечта шартнома таклиф қилган, бироқ «қайноқ» италянларни уларнинг ҳеч бири қизиқтирмади. Аста-секин каталонияликларнинг аргентиналик футболчига бўлган қизиқиши сунди. «Интер» эса ҳозирда Мартинес билан янги шартнома борасидаги музокараларни бошлаб юборган.

Каллум Ҳадсон-Одои «Челси»

Даъвогар: «Бавария»

«Челси»нинг трансфер бозоридаги шиддатли ҳаракатларидан сўнг лондонликлар ўзининг бир қатор футболчиларини ижарага бериб юбориши аниқ эди. Ҳадсон-Одои эса кўплаб гранд клублар, хусусан, «Бавария»ни ҳам жиддий қизиқтириб қўйганди. Мюнхенда 19 ёшли қанот ҳужумчисининг қобилияти ва истеъдодига юқори баҳо берилди. Аслида Мюнхен клуби уни анча олдин, 2019 йилда қўлга киритмоқчи бўлганди. 2020 йилнинг октябрь ойига келиб, Германия чемпионлари яна Ҳадсонга қўл узатди. «Бавария» «аристократлар»га 70 миллион евро тўлаш мажбурияти билан футболчини ижарага  беришни сўради. Клублар ўртасида дастлабки келишувга эришилганди ҳам, аммо сўнгги паллада Фрэнк Лэмпард масалага аралашиб, Ҳадсонни Лондонда олиб қолди.

Марио Балотелли «Брешиа»

Даъвогар: «Женоа»

Сўнгги бир неча ойдан бери Балотеллининг келажаги ноаниқлигича қолмоқда. «Брешиа» Б Серияга тушиб кетганидан кейин Марионинг жамоада қолмаслиги аниқ бўлганди. Ўз навбатида клуб раҳбарияти ҳам хулқ-атвори ва юқори маоши туфайли футболчидан халос бўлишни хоҳламоқда. Шу билан бирга томонлар ўртасидаги шартноманинг бекор қилинганлиги ҳақида ҳали ҳам аниқ маълумот берилмаган. Балотелли ҳозирча ҳеч қаерда ўйнамаяпти. Сентябрь ойида форвард «Женоа»га ўтишга яқин эди, бироқ Генуя клуб Элдор Шомуродов вариантини маъқул кўрди. Бундан ташқари, унга «Бешиктош» ва Бразилия клубларидан ҳам қизиқиш борлиги айтилди. Машҳур агент Мино Райола эса мижозининг Европада қолишига ишонмоқда. Воқеалар ривожини эса вақт кўрсатади.

Калиду Кулибали «Наполи»

Даъвогар: «Манчестер Сити»

Кулибалининг «Наполи»дан кетиши ҳақидаги миш-мишлар бир неча ой давомида тинмади. «Манчестер Сити» ҳақиқатан ҳам 29 ёшли сенегалликни ўз сафига қўшиб олишга жиддий бел боғлаганди. Бироқ италянлар билан келишиш ҳар доим ҳам осон бўлмаган. «Шаҳарликлар» неаполликларга футболчи борасида бир нечта таклифлар юборди, аммо уларнинг барчасига салбий жавоб қайтарилди. Кулибалини қўлга киритиш борасидаги узоқ ва муваффақиятсиз уринишлардан сўнг «Сити» тинчгина «Бенфика»дан Рубен Диашни сотиб олди, қўйди.

Аркадиуш Милик «Наполи»

Даъвогар: «Ювентус»

«Шошган қиз ...» деган мақол айнан Милик ҳикоясига ҳар жабҳада мос тушади: Андреа Пирло «Ювентус» бошқарувига келиши билан жамоа фаол тарзда форвард излай бошлади. Милик эса асосий номзодлар қаторида қайд этилди. Турин клуби футболчи билан шахсий келишувга ҳам эришганди. Бундан ҳаволанган полшалик футболчи жорий мавсум охирида якунланадиган шартномасини узайтиришни истамаслиги тўғрисида очиқчасига «Наполи»га маълум қилди. Аммо кутилмаганда «Ювентус» фикридан қайтиб қолди ва Альваро Моратани ижарага олди. Бу вақтга келиб, неаполликлар Миликнинг ўрнига Виктор Осимҳенни сотиб олиб бўлганди. Натижада Милик ҳам Туриндан, ҳам иссиқ жойидан қуруқ қолди (асосий таркибдаги ўрни назарда тутилмоқда). Ҳозирча унинг ўзи ҳам келгуси фаолиятини қаерда давом эттиришни билмайди.