20 март куни президентлар ва Голливуд актёрлари учун турли образлар яратган машҳур тикувчи Мартин Гринфилд вафот этди. Бу ҳақда “Правила жизни” нашри хабар бермоқда. У Нью-Йоркнинг Манхассет касалхонасида ҳаётдан кўз юмди. Ўлим сабаблари ошкор қилинмаган.
Мартин Гринфилд 1928 йил 9 августда Украинада туғилган. Ўсмирлик ёшида у немислар томонидан ташкил қилинган қирғин лагери — Освентимга келиб қолган ва мўжиза юз бериб, ўспирин газ камерасидан қочиб кетишга муваффақ бўлган.
Мартин концентрацион лагерда нацист соқчиларнинг кийимларини ювишга мажбур бўлган. Бир куни кир ювиш хонасида у тасодифан қўриқчи кўйлагининг ёқасини йиртиб юборган ва бунинг учун оғир калтакланган ва қўриқчи кийимини болага улоқтирган. Мартин кўйлакни ўзида сақлаб қолган ва лагернинг махсус формаси остида озод бўлгунга қадар кийиб юрган.
Бу ҳолат атрофдагиларнинг унга бўлган муносабатини ўзгартирди ва баъзилар Мартин қандайдир имтиёзлари бор деб ўйлади. Ушбу воқеаларни эслар экан, Мартин Гринфилд шундай деган:
“Мен бу кўйлакни биринчи бор кийганимда кийимнинг катта кучга эга эканлигини англаганман”.
Фото: The New York Times
Ҳолокост даврини бошидан кечиргач, Мартин АҚШга кўчиб кетди ва 19 ёшида тикув фабрикасига фаррош бўлиб ишга кирди. Бир неча йиллар ўтиб у Бруклинда ўз дўконини очди. Ўша даврда тикувчилик саноати яхши ривожланмаган эди. Бир неча ўн йил ичида унинг компанияси Қўшма Штатларнинг энг машҳур корхоналаридан бирига айланди ва DKNY, Brooks Brothers, Neiman Marcus ва Rag & Bone каби брендлар билан ҳамкорликни йўлга қўйди.
Мартин Гринфилдни “Американинг энг яхши тикувчиси” деб аташган. У АҚШ президентлари ва Голливуд юлдузларига турли образлар яратган. Унинг мижозлари орасида президентлардан Билл Клинтон, Дональд Трамп ва Барак Обама, актёрлардан Леонардо Ди Каприо, Жонни Депп, Мартин Скорсезе, қўшиқчилардан Майкл Жексон ва бошқа кўплаб машҳур юлдузлар бўлган.
Изоҳ (0)