Европада трансфер ойнаси бир неча кун олдин ёпилди. Энди клубларда фақат эркин агентларни қўлга киритиш имкони бор. Шунга қарамай ҳозирдан 2024 йилнинг ёзида клубларини алмаштириши мумкин бўлган футболчилар ҳақида миш-мишлар пайдо бўлмоқда.
Килиан Мбаппе: “ПСЖ”дан ”Реал”га
Албатта, бу “эртак” кўпчиликнинг жонига теккани аниқ, лекин бу сафар гап-сўзларда асос бўлиши мумкин. Сабаби энди бизга маълум бўлган таниқли сайтлар, обрўли шахслар бу трансфер албатта амалга ошишини таъкидламоқда.
Масалан, таниқли футбол инсайдери Фабрицио Романо ҳам трансфер ёзга режалаштирилганини айтиб ўтмоқда. Унинг сўзларига кўра, “Реал” ҳозир таклиф қилаётган сумма 2 йил аввалги суммадан бир неча баравар камроқ.
Хабарларга ишонадиган бўлсак, Мбаппе ўзининг қарорини шу яқин орада эълон қилади ва биз бу “эртак”нинг якунини билиб оламиз.
Эрлинг Ҳоланд: “Манчестер Сити”дан “Реал”га
Мбаппедан кўра Ҳоланднинг “қироллик клуби”га кўчиб ўтиши кўпроқ ишончлидек кўринмоқда.
Маълумотларга кўра, Эрлингга кўпроқ медиа эътиборида бўлиш учун ҳам испан клубига кўчиб ўтиши кераклигини тавсия қилишмоқда. Le Parisien нашри ҳам “Реал” клуби Мбаппедан ташқари норвегиялик футболчини ўз таркибига қўшмоқчи эканлиги ҳақида хабар бермоқда.
“Сити” мураббийи Пеп Гвардиола Ҳоланд Англиядаги ҳаётидан қониқаётганини таъкидлади. Агар Мбаппе трансфери амалга ошмаса, “Реал” клуби Ҳоланд вариантини кўриб чиқиши мумкин, аммо икки бўлажак юлдуз деб таърифланаётган Мбаппе ва Ҳоландни бир клубда тасаввур қилиш қийин.
Пётр Зелиньски: “Наполи”дан “Интер”га
Бу трансферни аллақачон амалга ошган трансферлар қаторига киритиб қўйиш мумкин. Ёзда эркин агентга айланадиган Зелиньски “Интер” клубига текинга кўчиб ўтади. Айнан шу сабаб, “Наполи” футболчини Чемпионлар Лигаси қайдномасига киритмади. Клуб президенти Аурелио де Лурентис футболчи қарор қабул қилиб бўлганини таъкидлади.
Фабрицио Романонинг фикрига кўра, “нераззури” шу ойнинг сўнгида футболчини ўз ўйинчиси сифатида таништиради.
Савио: “Жирона”дан “Манчестер Сити”га
Хабарларга кўра, Англия клуби вингер борасида келишувга эришган. Ҳозирда Савио “Жирона” клубида ижара асосида ўйнайди, унинг трансфер ҳуқуқи эса “Труа” клубига тегишли.
Инсайдер Фабрицио Романонинг фикрига кўра, 19 ёшли футболчи учун манчестерликлар 30 миллион евро тўлашга тайёр. Transfermarkt ҳам футболчини шунча нархга баҳолаган.
Савио Англия клубларида ўйнамаган. 2022 йилда “Труа” жамоасига ўтган футболчи аввалига ижара асосида “ПСВ” клубига, кейин эса ҳозирги “Жирона” клубига ўтган.
Марко Ройс: “Боруссия Д”дан “Боруссия М”га
Тажрибали футболчи 2012 йилдан бери Дортмунд клуби шарафини ҳимоя қилиб келади. Немис нашри Bild’да чиққан хабарларга таянадиган бўлсак, ҳозирги клуб мутасаддилари футболчи билан шартномани чўзишга иккиланмоқда.
Ройснинг ёши 34 да ва клуб унинг ўрнини ёшроқ ўйинчи билан тўлдирмоқчи. Футболчи эса ўзининг собиқ клубига қайтиши мумкинлигини айтиб ўтган. Марко у ерда футбол ўйнайдими ёки йўқ бу аниқ эмас. Сабаби клуб унга жамоанинг маъмурий лавозимларидан бирини таклиф қилмоқда.
Виктор Осимҳен: “Наполи”дан “ПСЖ”га
Агар Мбаппенинг “қироллик клуби”га трансфери амалга ошса, унинг ўрнини “Наполи” ўйинчиси эгаллаши мумкин.
Осимҳеннинг клуб билан шартномаси 2026 йилда тугайди, лекин футболчи келажаги борасида бир қарорга келган ва мавсум сўнгида эълон қилади. “Наполи” президенти де Лаурентис нигериялик футболчи Париж клубига ўтиши ўтган ёзда аниқ бўлганини таъкидлади.
Ҳозир “Наполи”да ишлар жойида эмас. Жамоа чемпионатда кетма-кет очколар йўқотмоқда, Италия Кубогидаги иштирокини ҳам якунлади ва жамоада ички низолар мавжуд.
Йозуа Киммих: “Бавария”дан “Манчестер сити”га
Киммихнинг жамоани тарк этиши ҳақидаги гаплар январь ойидаёқ тарқаган эди. Турли манбалар унинг кейинги жамоаси “ПСЖ”, “Тоттенҳэм” ёки “Барселона” бўлиши мумкинлиги ҳақида айтишди, аммо футболчи Мюнхенда қолди.
The Athletic нашри Киммих “Манчестер Сити” қизиқишлари доирасига тушгани ҳақида маълумот бермоқда. Йозуа Киммихнинг “Бавария” билан жорий шартномаси 2025 йилнинг ёзида тугайди. Англия клуби шу трансфер ойнасидаёқ футболчини қўлга киритмоқчи эди, аммо сўнгги лаҳзаларда бу фикридан қайтди.
Киммих ҳали шартномани узайтирганича йўқ, демак Гвардиола ёзда футболчини қўлга киритишга яна бир бор уриниб кўради.
Муҳаммад Салоҳ: “Ливерпуль”дан “Ал-Иттиҳод”га
Саудия клублари Европанинг энг ёрқин юлдузларини сафларига қўшаётган пайтда Салоҳ варианти ҳам кўп тилга олинди.
The Athletic нашрининг хабарига кўра, ўтган ёзда “Ал-Иттиҳод” клуби футболчи учун 200 миллион фунт стерлинг таклиф қилган ва бу таклиф ҳали ҳам амалда. Агар бу келишув амалга ошса, футболчи дунёнинг энг қиммат футболчисига айланади.
“Ливерпуль” бош мураббийи Юрген Клопп ҳам жамоани тарк этишини инобатга оладиган бўлсак, Салоҳнинг Саудия клубига ўтиш эҳтимоли баланд.
Альфонсо Дэвис: “Бавария”дан “Реал”га
Дэвиснинг ҳозирги шартномаси 2025 йилгача тузилган. Мюнхен клуби футболчи билан яна бирга ишлаш ниятида, аммо канадалик футболчининг талаблари уларни ўйлантирмоқда. Дэвис йилига 13-14 миллион даромад олишни ўйламоқда, немис клуби эса бундай катта миқдорни тўлаш ниятида эмас.
Bild нашрининг хабарига кўра, футболчи мюнхенликлар талабларини бажармаса уни сотиб юбориши мумкин. “Реал” эса клуб ва футболчи ўртасидаги мунозаларни ўз фойдасига ҳал қилиб, футболчига эга чиқмоқчи.
Қизиқарлиси шундаки, Дэвис “Бавария” клубида бахтли эканлигини таъкидламоқда.
Айван Тони: “Брентфорд”дан “Челси” ёки “Арсенал”га
Ўтган мавсум сўнгида футболчи Премьер Лига қоидаларини бузганлиги сабабли 8 ойга футболдан четлатилган эди. Тони январь ойида катта футболга қайтди ва икки ўйинда иккита гол урди.
Айван “Брентфорд” клуби ундан воз кечмай қўллагани учун миннатдор. Шунинг учун футболчи қишда жамоани тарк этмади ва клубни АПЛда сақлаб қолиш учун бор куч билан ўйнамоқда.
“Брентфорд” футболчи учун катта сумма сўрагани Лондон клубларини чўчитиб юборган бўлиши мумкин. The Independent нашрининг хабарига кўра, клуб футболчи учун 100 миллион фунт стерлинг сўраган.
Жамоа бош мураббийи Томас Франк Тони ёзда клубни тарк этиши ҳақида хабар берди. Transfermarkt машри 27 ёшли футболчини 35 миллион еврога баҳоламоқда. Кўрамиз, Тони Лондон клубларидан қайси бирини танлар экан.
Эркин Ғайбуллаев таржимаси
Изоҳ (0)