Шавкат Мирзиёев Боку шаҳрида ўтаётган БМТнинг Бутунжаҳон иқлим саммитида (CОP 29) ташкил этилган Ўзбекистон Миллий павильони билан танишди. Бу ҳақда Президент матбуот хизмати хабар берди.
Давлат раҳбарига павильоннинг ғояси ва унда ўтказилиши режалаштирилган тадбирлар ҳақида батафсил маълумот берилди.
Павильон Ўзбекистоннинг ноёб маданий мероси ҳамда экология ва иқлим масалаларига барқарор ёндашувларини намойиш этишга мўлжалланган. Унинг “Ички барқарорлик” деб номланган меъморий концепцияси инсоннинг табиат билан уйғунлигини ва оилавий қадриятларни ифодаловчи анъанавий ўзбек ҳовлисига асосланган.
Сомон сувоқ ва ёғоч каби экологик, анъанавий материаллардан фойдаланиб, азалдан ўзбек хонадонининг ажралмас қисми бўлмиш айвон ва сўридан илҳомланиб бунёд этилган павильон уйғун макон ҳосил қилади. Биргаликда ушбу меъморий ечимлар қулай микроиқлимни таъминлайди, шинам муҳит яратади ва барқарор келажак ҳақидаги ғамхўрликни акс эттиради.
Саммит кунларида бу ерда Оролбўйи минтақасининг ижтимоий-экологик муаммоларини ҳал этиш, “яшил” иқтисодиётни ривожлантириш, қайта тикланувчи энергия манбаларини ва сувни тежайдиган технологияларни жорий этиш, озиқ-овқат хавфсизлигини таъминлаш ҳамда биохилма-хилликни асрашга бағишланган 20 дан ортиқ қўшимча тадбир ўтказилиши режалаштирилган.
Шавкат Мирзиёевнинг Озарбайжонга ташрифи
Президент Шавкат Мирзиёев 12 ноябрь куни Боку шаҳрида ўтаётган БМТнинг Иқлим ўзгариши тўғрисидаги ҳадли конвенцияси Томонлари конференциясининг 29-сессияси (CОП 29) доирасидаги Жаҳон етакчилари саммитининг ялпи мажлисида нутқ сўзлади. Унда давлат раҳбари қатор ташаббусларни илгари сурди.
Шунингдек, Шавкат Мирзиёев иқлим бўйича саммит доирасида Европа кенгаши раиси Шарл Мишел билан учрашди. Ўзбекистоннинг Европа иттифоқи билан кўп қиррали ҳамкорлигини янада кенгайтириш масалалари кўриб чиқилди.
Ўзбекистон етакчиси CОП 29 саммити доирасида Финляндия президенти Александр Стубб билан ҳам учрашув ўтказди. Унда 2025 йил январь ойида Хелсинки шаҳрида бўлиб ўтадиган Ҳукуматлараро комиссиянинг навбатдаги йиғилиши ва бизнес форумига пухта тайёргарлик кўриш муҳимлиги таъкидланди.
Шавкат Мирзиёев ҳамда Черногория президенти Яков Милатович ўртасидаги учрашувда ҳукуматлараро комиссия тузиш ва унинг биринчи йиғилишини келгуси йилда Тошкент шаҳрида бизнес форуми билан биргаликда ўтказиш таклиф этилди.
Ўзбекистон етакчиси, шунингдек, Европа тикланиш ва тараққиёт банки президенти Одил Рено-Бассо ҳамда Ислом тараққиёт банки президенти Муҳаммад бин Сулаймон ал-Жассир билан ҳам музокаралар ўтказди.
13 ноябрь куни Ўзбекистон, Озарбайжон ва Қозоғистон раҳбарлари “яшил” энергияни ривожолантириш ва узатиш лойиҳасига старт берди. Тадбирда сўзга чиққан Шавкат Мирзиёев қайта тикланувчи энергия иқтисодий мақсад эмас, балки келажакка қўшилаётган ҳисса, келгуси авлодлар олдидаги масъулият туйғусининг натижаси эканлигини таъкидлади.
Шунингдек, Боку шаҳрига амалий ташриф доирасида 13 ноябрь куни Шавкат Мирзиёев Илҳом Алиев билан учрашув ўтказди.
Изоҳ (0)