Тошкент шаҳрининг Янгиҳаёт туманида яшаш учун яроқсиз бўлган 409 та икки қаватли ёғоч уйлардан иборат “Йўлдош” (илгари “Спутник” массиви деб номланган) мавзесини янгилаш ишлари бошланди. Бу ҳақда пойтахт ҳокимлиги ҳузуридаги Tashkent Invest компанияси матбуот хизмати хабар берди.
Маълум қилинишича, ушбу уйлар аҳолиси учун “Гулшанобод” маҳалласида “Янги маҳалла” турар-жой мажмуаси барпо этилади. Лойиҳа GC-Group Industries МЧЖ томонидан 2024—2027 йиллар давомида 24 гектар майдонни қамраб олган ҳудудда амалга оширилади.
Мажмуа ҳудудида 13 392 та хонадонга мўлжалланган 93 та 16 қаватли замонавий уй қурилади. Инфратузилмага 1600 ўқувчига мўлжалланган мактаб, 600 ўринли болалар боғчаси ва сунъий кўл киради. Уйларнинг биринчи қаватлари яшаш учун мўлжалланмаган бўлиб, маиший хизмат кўрсатиш зоналари ҳамда ерусти ва ерости автотураргоҳлар жойлаштирилади.
Қайд этилишича, ҳозирда шартномалар тузиш бўйича ишлар олиб борилмоқда.
“Йўлдош” мавзеси ҳақида
“Йўлдош” мавзеси ҳудудида аҳоли 1966 йилнинг ёзида яшай бошлаган. Шаҳарликлар учун уй-жой масаласининг вақтинчалик ечими сифатида тўрт юздан ортиқ икки қаватли ёғоч уйлар қурилган.
Tashkent Invest компанияси хабарида қайд этилишича, ҳозирги пайтда бундай уй-жойлар маънан эскирган ва хонадонларнинг кичик майдони (ҳар бир кишига 16 квадрат метрдан кам) ҳамда оддий маиший шароитларнинг йўқлиги сабабли сифатли уй-жойга қўйиладиган замонавий талабларга жавоб бермайди.
Аксарият уйларнинг ёғоч қурилиш конструкциялари ва муҳандислик тармоқлари юқори даражада жисмоний эскирган, шунингдек, энергия тежамкор эмас ва ёнғин хавфи юқори.
“Бундай уйларда яшаш шаҳарликлар учун ноқулай ва ҳатто хавфлидир”, дейилади компания хабарида
“Йўлдош” мавзесини реновация қилиш дастури
Ушбу муаммонинг ечими сифатида мазкур ҳудудни реновация қилиш дастури ишлаб чиқилган бўлиб, у қуйидаги босқичлардан иборат:
1) “Йўлдош” мавзеси ҳудуди кўп йиллардан буён экологик тизимга салмоқли ҳисса қўшаётган чинор (платан), липа, эман ва бошқа турдаги дарахтлардан иборат яшил ўсимликлар билан қалин қопланганлиги сабабли реновацияни бошқа жойда амалга оширишга қарор қилинди. Ушбу ечим кислород ишлаб чиқариш ва экологик мувозанатни сақлашга ёрдам берадиган ноёб табиий шароитларни сақлаб қолиш имконини беради. Массив аҳолисини кўчириш учун шу тумандаги яқин ҳудудлар ажратилди, бу уларга одатий инфратузилма ва маҳалла билан алоқани сақлаб қолиш имконини беради.
2) Ушбу масалани ҳал қилиш учун бир нечта жой ўрганилиб, “Гулшонобод” маҳалласи ҳудудининг барча мезонларга жавоб берадиган ва “Йўлдош” мавзеси дан 1500 метрдан ортиқ бўлмаган масофада жойлашган ер участкаси танланди.
3) Tashkent Invest АЖ қурувчи компания билан биргаликда замонавий шаҳарда замонавий туман лойиҳаси ва концепциясини ишлаб чиқмоқда, унда замон талабларига жавоб берадиган ижтимоий, транспорт ва коммунал инфратузилма назарда тутилади. Хонадонларнинг дастлабки ва охирги пардозлашига алоҳида эътибор қаратилади.
4) Ушбу лойиҳа қурилиш компанияси билан тузилган инвестиция шартномаси асосида амалга оширилади, унда квартираларни давлат уй-жой фондига бериш шартлари акс эттирилган.
5) 2018 йил 12 апрелдаги ЎРҚ-474-сон қонуни ва 2019 йил 7 ноябрдаги ЎРҚ-581-сон қонунига мувофиқ “Йўлдош” мавзеси аҳолисини кўчириш амалга оширилганда, шунингдек, жамоатчилик муҳокамаси натижаларига кўра, аҳолига замонавий талабларга жавоб берадиган тенг қийматли квартиралар (масалан, эски уйдаги 1 хонали уй ўрнига янги уйдаги 1 хонали уй) берилади.
Муҳтож аҳолига янги уйга кўчиб ўтишда ёрдам кўрсатилади.
Бундан ташқари, аҳоли ўз уй-жойини кенгайтириш, қўшимча ҳақ эвазига қўшимча хоналар сотиб олишда имтиёзли ҳуқуққа эга бўлади.
6) “Йўлдош” мавзеси ҳудудида мавжуд дарахтларни сақлаб қолиш ва даволаш ҳамда янги дарахт ва буталарни ўтқазиш орқали замонавий дендропарк ташкил этиш режалаштирилган.
Тошкентнинг Янгиҳаёт туманида жойлашган 400 дан зиёд икки қаватли ёғоч уйлар бузилиб уларда яшовчи 4 мингдан зиёд хонадон туман марказида қуриладиган янги уйларга кўчирилиши ҳақида 2021 йилнинг февралида туман ҳокими Ҳаёт Иноғомов айтганди.
Президент Шавкат Мирзиёев 2022 йилнинг февралида Сергели ва Янгиҳаёт тумани фаоллари билан йиғилишда эски ёғоч уйларнинг бузилишига тўхталиб ўтганди.
“Йўлдош” (“Спутник”) мавзесидаги эскирган 2 қаватли 409 та ёғоч уй бузилиб, уларнинг эгаларини замонавий кўп қаватли турар жойларга кўчириш дастури бошланади. Бунда улар учун келгуси беш йилда “Янги Дархон” маҳалласидаги 14 гектар ҳудудда янги кўп квартирали уйлар қурилади” деган эди президент.
Шавкат Мирзиёев бу уйдан кўчишни истамаганлар кўчирилмаслигини таъкидлаганди.
“Агар бирорта одам бу ота-бобомдан қолган уйим, бу уй музей мен учун, кўчмайман деса кўчирмаймиз. Лекин бу уйлар авариявий ҳолатда. Ўрнига янги ва сифатли уй қурилса, тўғри тушунтирилса одамлар ўзи истайди кўчишни. Маҳалла раислари ҳам инсонларга буни тўғри тушунтириши керак”, деган эди давлат раҳбари.
2024 йилнинг февралида Тошкент шаҳар ҳокими Шавкат Умурзоқов пойтахтда 500 гектардан ортиқ ҳудуд реновацияга тушганини айтганди.
“Кўп йиллар илгари икки қаватли бинолар, Сергели туманида вақтинчалик уйлар қурилган. Улар талабга жавоб бермайди ва хавфсизлик нуқтайи назаридан рисклари катта”, деган эди ҳоким “Ўзбекистон 24” телеканалига берган интервьюсида.
Давлат бизнесга шароит яратиб бергани учун хусусий сектор уларни келгусида бемалол кўчиришини, у ерларга чиройли қурилиш объектларини барпо этилишини билдирганди.
Tashkent Invest компанияси матбуот хизматининг билдиришича, шаҳарсозлик нормаларини бажариш учун 2025 йилнинг 1-чорагида очиқ жамоатчилик муҳокамасини ўтказиш режалаштирилган.
Изоҳ (0)