Вазирлар Маҳкамасининг “Давлат театрлари, театр студиялари, цирк ва концерт-томоша муассасаларининг артист ходимларига малака тоифаларини бериш тартиби тўғрисидаги низомни тасдиқлаш ҳақида”ги қарори қабул қилинди.
Ҳужжат президентнинг 2024 йил 21 февралдаги “Ўзбекистон – 2030” стратегиясини “Ёшлар ва тадбиркорликни қўллаб-қувватлаш йили”да амалга ошириш давлат дастури тўғрисида”ги фармонига мувофиқ қабул қилинди. Унда давлат театрлари ва концерт-томоша муассасаларида фаолият юритаётган ходимларнинг фаолиятини тартибга солиш ҳамда қўшимча рағбатлантириш назарда тутилган.
Низом қуйидагиларни белгилайди:
- театр, цирк ва концерт-томоша муассасаларида малака тоифалари билан лавозимларни бериш тартиби;
- малака тоифаларини бериш мезонлари, тартиби ва муддатлари;
- тоифани пасайтириш ёки бекор қилиш асослари;
- малака тоифаларини бериш билан боғлиқ шикоятларни кўриб чиқиш тартиби.
Малака бериш қуйидаги баҳолаш мезонларига асосланади:
- ижодий қобилиятлар;
- иш стажи;
- турли концертлар ва спектаклларда иштирок этиш сифати ва сони;
- жамоат ишлари ҳамда маънавий-маърифий ва ижодий йиғилишлардаги фаоллик.
Малака тоифаси йилда бир марта белгиланади ва бадиий кенгаш хулосаси асосида муассаса директорининг буйруғи билан расмийлаштирилади.
Маданият вазирлиги бир ой муддатда давлат театр-студиялари, цирк ва концерт-томоша муассасалари артист ходимларининг ижодий фаолиятини баҳолаш мезонларини, давлат театрлари, давлат театр-студиялари, цирк ва концерт-томоша артист ходимларининг ижро этиш меъёрларини тасдиқлаши лозим.
Аввалроқ Ўзбекистонда давлат маданият муассасалари ва ташкилотлари ходимларининг иш ҳақи 2025 йилда икки марта оширилиши ҳақида хабар берилганди. Драматург ва ёш режиссёрлар учун мукофот таъсис этилади. 2025 йилдан ҳар 2 йилда тарихий ва замонавий мавзулар бўйича “Энг яхши песалар” танлови ташкил этилади. Шунингдек, Ўзбекистон театр жамоаларининг миллий рейтинги тузилади.
Изоҳ (0)