АҚШнинг сайланган президенти Дональд Трамп 2025 йил январь ойида лавозимига киришган, АҚШда туғилган хорижликларга фуқаролик беришни тўхтатмоқчи. Бу ҳақда NBC News хабар берди.
Трампнинг сўзларига кўра, ҳозирги тизим ноқонуний миграцияни рағбатлантиради ва ижтимоий хизматларга юкламани орттиради. Шу сабабдан у АҚШ фуқароси бўлмаган ота-оналардан туғилган болаларга фуқароликни автоматик беришни тўхтатадиган фармон чиқармоқчи.
Тегишли режага қаршилар ҳам бор. Улар қонун ўзгариши конституцияга зид бўлиши мумкин деб ҳисоблайди. Чунки АҚШ Конституциясига киритилган 14-тузатиш мамлакат ҳудудида туғилган барча шахсларга фуқаролик ҳуқуқини беришни назарда тутади.
Мутахассисларга кўра, тегишли ҳуқуқни бекор қилиш нафақат президент фармонини, балки Конституцияга ўзгартириш киритишни ҳам ўз ичига олган мураккаб ҳуқуқий ва қонунчилик далилларини талаб этади.
Сўнгги пайтларда фарзанд кўриш учун Америкага бориш оммалашиб кетди. Кўпинча бўлажак ота-оналар бунинг учун соҳилдаги илиқ штатларни танлайди. Бозорда бундай саёҳатларни ташкил этишда ёрдам берадиган сайёҳлик агентликлари мавжуд. АҚШнинг айрим перинатал марказларида МДҲдан келган ота-оналарга рус тилида сўзлашувчи ходимлар хизмат кўрсатади.
Мигрантлар учун “қора кунлар”
Сайланган президент маъмурияти Байденнинг мигрантларнинг мамлакатга қонуний йўл билан киришига рухсат берган гуманитар дастурларини ҳам тўхтатиш ниятида. Бунда рухсатнома муддати тугаганлар АҚШни тарк этишга мажбур бўлиши мумкин.
Трамп чегарага Миллий гвардия қўшинларини жўнатишни ва ноқонуний миграция туфайли миллий фавқулодда ҳолат эълон қилишни режалаштирмоқда. У чегара деворини қуришга бюджетдан маблағ олиш учун шундай қарор қабул қилиши мумкин. Трамп янги муддатни ноқонуний мигрантларга қарши чоралар билан бошлайди.
Изоҳ (0)