Ахборот ва оммавий коммуникациялар агентлигида Маданият вазирлиги томонидан 2024 йилда амалга оширилган ишлар сарҳисоби ҳамда 2025 йилдаги истиқболли режаларга бағишланган матбуот анжумани ўтказилди.
Унда маданият вазири Озодбек Назарбеков иштирок этиб, даставвал амалга оширилган ишлар ҳақида ҳисобот берди. Шунингдек, журналистларнинг саволларига жавоб қайтарди.
Вазир анчадан бери муҳокамаларга сабаб бўлаётган “маданият соҳасида давлат регулятор бўлмаслиги, вазирлик ёпилиши кераклиги”га оид саволга жавоб берар экан, соҳани назоратда ушлаш кераклиги, бошқа имкони йўқлигини, эркин бўлиши учун жамият ҳам бунга тайёр бўлиши зарурлигини билдирган.
“Тўғри, саволнинг оёғи қаерда тургани муҳим. Бу саволнинг оёғи Американинг нариги ёғида турибди. Барака топкурлар, оёғингизни ота-онангиз, боболарингиз босган изга қўйинг-да, бу савол чиқмайди сиздан. Боя тушунтирдим, маданият соҳаси — қуш, буни шундай (сиқиб) ушлаш керак, бошқа имкони йўқ. Очсангиз, ҳам манфаат бермайди, фақат бузғунчилик олиб киради. Барака топкурлар, дунёни кўринглар соғлом одамсизлар-ку.
Эркинлик бериб юборилган жойда санъаткорлар ҳамма ерни бузяпти-ку, расво қилиб юборяпти-ку. Шунинг учун мен эркинлик бермайлик демоқчи эмасман, тақиқларга мутлақ қаршиман. Лекин эркин одамнинг интеллекти шунга лойиқ бўлиши керак. У тўрт деворнинг ичида ҳам жиноят қилмаслиги керак. Ана ўша кун келганда эркинликни бемалол мажбурлаб берамиз, керак бўлса. “Йўқ, бўлмайман” деса ҳам, “йўқ, сен эркин яшашинг керак” деймиз. Лекин бугун бутун жамият шунга лойиқ деб айтолмаймиз-ку. Бу саволни виждонимизга қўяйлик”, деди вазир.
Изоҳ (0)