Ўзбекистон тарихда илк маротаба БМТнинг Озиқ-овқат ва қишлоқ хўжалиги ташкилоти (FAO) кенгашига бир овоздан сайланди. Бу ҳақда Ташқи ишлар вазирлиги хабар берди.
Унда айтилишича, 4 июль куни Римда бўлиб ўтган Бирлашган Миллатлар Ташкилотининг Озиқ-овқат ва қишлоқ хўжалиги ташкилоти (FAO) кенгашининг 2028—2029 йилларга мўлжалланган аъзолигига сайловда Ўзбекистон тарихида биринчи марта ушбу нуфузли орган таркибига бир овоздан сайланди.
Кенгаш географик тақсимотни ҳисобга олган ҳолда 3 йилгача муддатга сайланадиган 49 та аъзо давлатдан иборат. Кенгаш ўз ваколатлари доирасида бюджет, FAO дастурларини муҳокама қилади ва конференцияга муҳим қарорлар ва тавсиялар беради.
“Ўзбекистоннинг мазкур органга сайлангани президент раҳбарлигида қишлоқ хўжалиги ва озиқ-овқат хавфсизлиги соҳасида амалга оширилаётган ўзгаришлар ва мамлакатнинг глобал жараёнлардаги роли ортиб бораётгани халқаро миқёсда эътироф этилганининг ёрқин ифодасидир.
FAO кенгашига аъзолик Ўзбекистон учун глобал қишлоқ хўжалиги ва озиқ-овқат сиёсатини шакллантириш, меъёрий ҳужжатлар ва стандартларни ишлаб чиқиш, миллий ва минтақавий ташаббусларни тақдим этиш, шунингдек, лойиҳаларни илгари суриш ва қўшимча молиявий ресурсларни жалб қилишда кенг имкониятлар очади”, дейилади хабарда.
Президент Шавкат Мирзиёев 2024 йил 5 сентябрь куни БМТнинг Озиқ-овқат ва қишлоқ хўжалиги ташкилоти (FAO) бош директори Сюй Дунюйни қабул қилган эди.
Суҳбат давомида Ўзбекистон ва FAO ўртасидаги замонавий хавф-хатар ва таҳдидларга қарши самарали чора кўриш борасидаги стратегик шерикликни янада кенгайтириш масалалари муҳокама қилинганди.
2025 йилгача бўлган даврда ҳамкорлик бўйича мамлакат дастурини бажариш сифат кўрсаткичлари икки баробар яхшиланди. Ҳозирда 34 та лойиҳа фаол амалга оширилмоқда. Ўтган бир йил ичида деҳқончилик, мактабларда овқатланиш, ветеринария, агрокимё ва бошқа соҳаларда 7 та янги лойиҳа ишга туширилди.
Изоҳ (0)