Тошкент шаҳар, Мирзо Улуғбек туманидаги Ўзбекистон овози кўчаси тубдан таъмирланиб, замонавий инфратузилма, туризм кўчасига айлантирилмоқда. Бу ҳақда туман ҳокимлиги матбуот хизмати хабар берди.
Маълум қилинишича, қурилиш, таъмирлаш ишларини жадаллаштириш мақсадида Содиқ Азимов кўчаси ва Ўзбекистон овози кўчалари кесишмасида автомашиналар ҳаракати 2 июль соат 12:00 дан 5 июль соат 8:00 га қадар чекланади.
Қайд этилишича, Мустақиллик шоҳкўчасидан ҳаракатланганда Махатма Ганди кўчасига ўтиш ва қайрилиб олиш мумкин. Шунингдек, Махтумқули кўчасидан ҳаракатланганда Содиқ Азимов кўчасининг Ўзбекистон овози кўчасига туташ қисмидан қайрилиб олиш мумкин.
Таъмирлаш ишлари кун-у тун ташкил этилиши ва икки сменада амалий ишлар олиб борилиши қўшимча қилинган.
Республика болалар кутубхонасида “Ўзбекистон овози кўчаси: Кеча, бугун, эртага” ободонлаштириш ғоясининг тақдимоти бўлиб ўтган эди. Россиянинг Ludi_Аrchitects бюроси меъморлари аҳоли ва шаҳар маъмурияти эътиборига кўчанинг “Ўзбекистон” меҳмонхонасидан Экопарккача — реконструкция қилиш концепцияси, янги қиёфасини ҳавола қилди. Лойиҳа “Ташкент Инвест” компанияси ташаббуси ҳамда Ўзбекистон Маданияти ва санъатини ривожлантириш жамғармаси бошчилигида яратилган.
Ўзбекистон овози — Тошкентнинг марказий кўчаларидан бири. У Мирзо Улуғбек туманида жойлашган ва қисман Буюк ипак йўли турар жой мавзесига киради. Узунлиги 750 метр, кенглиги 25 метрдан 40 метргача, ҳозирда автомобиль йўллари сони 2 та.
Изоҳ (0)