Россиянинг собиқ транспорт вазири Роман Старовойт Одинсово шаҳрида ўлик ҳолда ҳолда топилди. Бу ҳақда Россия Федерацияси Тергов қўмитаси расмий вакили Светлана Петренко маълум қилди.
“Бугун Одинсово шаҳар округида Россия Федерациясининг собиқ транспорт вазири Роман Владимирович Старовойтининг шахсий автомобилида ўқотар қуролдан жароҳат олган жасади топилди. Россия Тергов қўмитасининг Москва вилояти бўйича Бош тергов бошқармаси ходимлари воқеа жойида ишлаяпти, ҳодиса тафсилотлари аниқланмоқда. Асосий версия — ўз жонига қасд қилиш”, деди у.
7 июль куни президент Владимир Путин Старовойтни транспорт вазири лавозимидан озод этиш тўғрисидаги фармонни имзолади. Вазирлик раҳбари вазифасини вақтинча бажарувчи этиб вазир ўринбосари, Новгород вилоятининг собиқ губернатори Андрей Никитин тайинланди. Старовойт вазирлик лавозимида бир йилдан сал кўпроқ ишлаган эди.
Россия президенти матбуот котиби Дмитрий Песков Старовойтнинг истеъфоси ишончнинг йўқолиши билан боғлиқ эмаслигини ва фармонда бундай таъриф йўқлигини таъкидлаган.
Маълумотларига кўра, унинг ишдан олинишига Украина билан чегарада мудофаа иншоотларини қуриш чоғида бюджетдан камида бир миллиард рубль ўғирлаш бўйича жиноий иш юзасидан қамоққа олинган Курск вилоятининг собиқ губернатори Алексей Смирнов Старовойтга қарши кўрсатма бергани сабаб бўлиши мумкин.
Старовойт 1972 йил 20 январда Курскда туғилган. 2012—2018 йилларда “Росавтодор”га раҳбарлик қилган. 2018 йил сентябрь—октябрь ойларида Россия Федерацияси транспорт вазирининг ўринбосари лавозимида ишлаган, бироқ ўша йилнинг 11 октябрида Курск вилояти губернатори вазифасини вақтинча бажарувчи этиб тайинланган. 2019 йил сентябрь ойида 81,07 фоиз овоз билан вилоят раҳбари этиб сайланган. 2024 йил 14 майда Транспорт вазирлигига раҳбар этиб тайинланган.
Изоҳ (0)