Эрон яқин ҳафталар ичида Теҳрон ва БМТнинг ядро назорати органи ўртасидаги ҳамкорликнинг янги шаклини муҳокама қилиш учун Халқаро атом энергияси агентлиги (МАГАТЭ) техник миссиясини қабул қилишга розилик билдирди. Бу ҳақда Эрон ташқи ишлар вазири ўринбосари Козим Ғарибободий Нью Йоркка ташрифи чоғида маълум қилди.
У журналистларнинг саволларига жавоб берар экан, делегация Эронга (ядро) объектларини кўздан кечириш учун эмас, балки ушбу ҳамкорлик шаклини муҳокама қилиш мақсадида ташриф буюришини билдирган.
Шунингдек, Ғарибободий Эроннинг ўз эҳтиёжларини қондириш учун уран бойитиш ишларини мустақил равишда амалга ошириш ниятида эканлигини ва бу масалада бошқаларга таяниб бўлмаслигини таъкидлаган.
“Уран бойитиш масаласига келсак, Эрон ўз эҳтиёжларига мувофиқ уранни бойитади. Мен шуни айта оламан. Биз ўзимизга зарур бўлган барча ишларни қила олишимиз керак... Бу борада бизда жуда ачинарли тажриба мавжуд. Биз ташқи ижрочига суяна олмаймиз”, деди у.
2 июль куни Эрон президенти Масъуд Пезешкиён Теҳрон ва МАГАТЭ ўртасидаги ҳамкорликни тўхтатиш тўғрисидаги қонунни имзолади. Ҳужжат президент томонидан имзоланган пайтдан бошлаб қонунан кучга кирган ва бажарилиши мажбурий ҳисобланади.
Исроил 13 июнь кечаси Эронга зарбалар беришни бошлади. Уларнинг мақсади Теҳроннинг ядро ва ракета дастурлари билан боғлиқ объектлар эди. Бир суткадан камроқ вақт ўтиб, Эрон жавоб ҳужумини амалга оширди. 22 июнь кечаси АҚШ Қуролли кучлари Эроннинг учта ядровий объектига ҳужум қилди, 23 июнь кечқурун эса Теҳрон Қатардаги Яқин Шарқнинг энг йирик Ал-Удейд Америка ҳаво базасига ракета зарбалари берди. Кейинроқ АҚШ президенти Дональд Трамп Исроил ва Эрон ўт очишни тўхтатиш режимига келишиб олганини маълум қилди. Бу келишув 24 июндан кучга кирди.
Изоҳ (0)