Божхона қўмитаси Ўзбекистонда рўйхатдан ўтган 59 та автомобиль Тожикистонда ноқонуний сотиб юборилганини маълум қилди.
Қўмитанинг Контрабандага қарши курашиш бошқармаси томонидан Тошкент шаҳар, Тошкент ва Наманган вилоятлари божхона бошқармаларининг Контрабандага қарши курашиш бўлимлари тезкор ходимлари билан ҳамкорликда автомобилларни ноқонуний сотиб юбориш билан шуғуланувчи 8 нафар шахс фош этилган.
Улар BYD, Volkswagen, Kaiyi Х3, Honda, Geometry, Faw ID4 ва бошқа русумлардаги 59 та автотранспорт воситасининг ҳар бирини 100-200 доллар эвазига Тожикистонга ўтказиб берган. Мазкур автотранспорт воситаларининг барчаси қўшни давлатда ноқонуний тарзда сотиб юборилган.
Ҳолат юзасидан Божхона қўмитасининг Суриштирув ва маъмурий амалиёт бошқармаси томонидан терговга қадар текширув ҳаракатлари ўтказилиб, Жиноят кодексининг тегишли моддалари билан жиноят иши қўзғатилди ва тергов органига топширилди.
“Агар ишончнома асосида берилган автотранспорт воситасини қайтариб олишда муаммоларга дуч келаётган бўлсангиз ёки автомашина Ўзбекистондан олиб чиқиб кетилгани юзасидан шубҳа ва гумонларингиз бўлса, зудлик билан ҳуқуқни муҳофаза қилувчи идораларга мурожаат қилишингизни сўраймиз”, дейилади хабарда.
Божхона қўмитаси шахсий автотранспорт воситаларини бошқа шахсларга ишончнома орқали беришда ҳушёр бўлишга чақирди.
Изоҳ (0)