Самарқанд ва Қашқадарё вилоятлари оралиғидаги Тахтақорача довонида туннел қуриш бўйича тендер давом этмоқда. Жараёнда учта компания даъвогарлик қиляпти. Бу ҳақда жорий йил 11 июлдаги парламент йиғилишида транспорт вазири Илҳом Маҳкамов маълум қилди.
Илҳом Маҳкамовнинг айтишича, туннел узунлиги 7 километр бўлади. Қурилиш давлат-хусусий шерикчилиги асосида амалга оширилади. Туннелдан пулли йўл сифатида фойдаланиш кўзда тутилмоқда.
“Туннел қуришга талабгорларда техник-иқтисодий асосларини тақдим қилиш масаласи қолди. Август ойида учта талабгордан бири ғолиб деб топилади ва у билан туннел қуриш ишлари бошланади. Мукаммал ишлаб чиқилаётган лойиҳавий ишларни бу йил битказиб, талабгорни аниқлаб, у билан шартнома тузамиз”, деди вазир.
Президент Шавкат Мирзиёев 2023 йил 11 июлдаги йиғилишда Тахтақорачада туннел қуриш бўйича тўрт йил аввал топшириқ берилгани, аммо ҳали лойиҳа ҳам мавжуд эмаслигини танқид қилганди. Ўша йилнинг октябрь ойида Қашқадарё вилоятидаги йиғилишда яна бир бор мазкур туннел масаласи кўтарилган. Мутасаддиларга Тахтақорача довонидан ўтиш талабларини енгиллаштириш топшириғи берилган.
“Келгуси йилда Тахтақорача довонида янги туннел ва йўл қуриш лойиҳаси бошланади. Хитойлик инвесторлар билан бирга Самарқанд билан Шаҳрисабзни боғловчи 30 километр йўлни таъмирлаш ишлари бошланади. Шунингдек, Ғузор—Бухоро—Нукус—Бейнеу йўлининг Қашқадарёдан ўтган 100 километр қисмини таъмирлашга 122,5 миллион доллар жалб қилинади. Умуман, келгуси йилда хорижий сайёҳларни 500 мингтага етказиш вазифаси қўйилди”, дея хабар берганди президент ахборот хизмати.
Илҳом Маҳкамовнинг айтишича, лойиҳа кечикаётгани қурилиш ҳудудининг географик жойлашуви билан боғлиқ. Вазир депутатларни тез орада туннел қурилиши бошланишига ишонтирди.
Изоҳ (0)