Ўзбекистонда меҳнатга лаёқатли аҳоли ўртасида ишсизлик даражаси 2020 йилдаги 10,5 фоиздан 2024 йил бошига келиб 6,8 фоизга тушди. Бу ҳақда Камбағалликни қисқартириш ва бандлик вазирлиги матбуот хизмати хабар берди.
Қайд этилишича, камбағаллик даражаси 2021 йилдаги 17 фоиздан, 2023 йилда 14 фоиз ва 2024 йил бошига келиб 11 фоизга тушди.
Ўтган 6 ойда аҳоли бандлигини таъминлаш ва камбағалликни қисқартириш мақсадида 113 минг нафар ишсиз аҳоли касб-ҳунар ва тадбиркорлик кўникмаларига ўқитилди. Кўрсаткич ўтган йилнинг мос даврига нисбатан 1,5 баравар ошди. Қўшимча тарзда, 12 та янги касбга ўқитиш йўлга қўйилди. Бугунги кунда 30 дан ортиқ касб турларига ўқитилмоқда. Хорижий тилларга ўқитиш 10 минг нафарга етказилиб, ўтган йилга нисбатан беш бараварга оширилди.
2024 йилнинг 6 ойида хорижда ишлаш истагида бўлган 64 минг нафар шахс чет давлатларга қонуний, хавфсиз ҳамда уюшган ҳолда ишга юборилди.
Меҳнат ва меҳнатни муҳофаза қилиш қонунчилигига риоя этилиши юзасидан Давлат меҳнат инспекторлари томонидан 7720 та назорат тадбири ўтказилган бўлиб, унда 21 436 та қонун бузилиш ҳолати аниқланган. Ушбу қонун бузилишларни бартараф этиш бўйича иш берувчиларга бажарилиши мажбурий бўлган 3 442 та ёзма кўрсатма, 90 та тақдимнома киритилган. Шунингдек, 4 335 нафар мансабдор шахсга нисбатан маъмурий жарималар қўлланилган.
Шу йилнинг ўтган даврида 254 нафар ноқонуний ишдан бўшатилган ходим ишга тикланган ҳамда 7 349 нафар фуқаронинг 31 миллиард сўмдан ортиқ иш ҳақлари ундириб берилган.
Президент маҳаллада “еттилик” ҳамфикр ва ҳамжиҳат бўлса, ишсизлик, жиноят бўлмаслигини айтганди. Бунинг учун уларда етарли ваколат борлигини, мутасадди ташкилотларни жалб этиб, одамларнинг даромад топишига ёрдам бериш кераклигини таъкидлаганди.
“Ўзбекистон-2030” стратегиясига мувофиқ, 2024 йилда камбағаллик даражасини 10 фоизгача тушириш режалаштирилган.
Изоҳ (0)