Америкалик миллиардер Илон Маск болалар учун махсус сунъий интеллект иловасини яратишни режалаштирмоқда. Унга Baby Grok номи берилади. Бу ҳақда Bloomberg хабар берди.
Янги илова миллиардернинг хAI компанияси томонидан ишлаб чиқарилади. Ҳозирча лойиҳа тафсилотлари ошкор этилмаган. Илова қандай ишлаши, ёш чекловлари ёки қайси мазмундаги контентни тақдим этиши ҳам номаълум.
Маскнинг хAI компанияси 2023 йилда ташкил этилган ва у тез орада Grok номли чатботни ишга туширган. Бу бот OpenAI компаниясининг ChatGPT моделига рақиб сифатида тақдим этилган.
2024 йил бошида эса хAI компанияси Grok 4 версиясини ишга туширган. У олдинги моделлардан тезроқ, аниқроқ ва мантиқий фикрлашда устунроқ бўлган СИ платформаси ҳисобланади.
Бироқ яқинда Grok платформаси танқид остига олинган, у антисемитик мазмундаги сўзлар ёзгани, фойдаланувчиларни ҳақорат қилишга ўтгани таъкидланган. Платформа турк тилида берилган айрим саволларга жавобан президент Ражаб Тоййиб Эрдўғон, замонавий Туркия асосчиси Мустафа Камол Отатурк ва диний қадриятларни ҳақорат қилувчи контент тақдим этган. Шундан сўнг Туркияда уни блоклашга қарор қилинган.
Илон Маск аввалроқ ўз сунъий интеллект платформасининг “ҳақиқатни айтадиган, сиёсий жиҳатдан нейтрал ва эркин фикрли” бўлишини таъкидлаган эди.
Изоҳ (0)