Саудия Арабистонининг “Ал-Аҳли” клуби аргентиналик ҳужумчи Лионель Мессини “Интер Майами” билан тузилган шартномаси якунлангач, ўз сафига қўшиб олишни истамоқда. Бу ҳақда Франциянинг L’Equipe нашри хабар берди.
Манбанинг маълумотига кўра, “Ал-Аҳли” раҳбарияти бир неча ҳафтадан буён 37 ёшли футболчини трансферга рози қилиш учун музокара олиб бормоқда. Эҳтимолий трансфернинг молиявий тафсилотлари ҳозирча ошкор этилмаган, бироқ Саудия Арабистони клуби Мессининг трансферини амалга ошириш учун барча имкониятларни ишга солмоқчи.
Саудия Арабистони сўнгги йилларда бир қатор юлдуз футболчиларни жалб этиш орқали мамлакат футболини жаҳон даражасига олиб чиқиш йўлида фаол ҳаракат қилмоқда. Агар Месси “Ал-Аҳли” таклифини қабул қилса, бу трансфер нафақат Саудия чемпионати, балки бутун футбол олами учун муҳим воқеа бўлиши мумкин, дейилади L’Equipe нашрида.
Аввалроқ оммавий ахборот воситаларида Месси АҚШ клубида қолишни мақсад қилгани ҳамда бу борада музокара олиб бораётгани борасида хабарлар тарқалган эди.
Эслатиб ўтамиз, Лионель Месси ҳозирда “Интер Майами”да сафида тўп сурмоқда. У клуб билан 2023 йилда шартнома имзолаган бўлиб, келишув 2025 йилнинг 31 декабрига қадар амал қилади.
Изоҳ (0)