Исроил Эронга ҳаво зарбалари тўлқинини бошлаганидан кейин бир қанча авиакомпаниялар Яқин Шарқдаги парвозларни тўхтатди ёки бекор қилди ва баъзи давлатлар ўз ҳаво ҳудудини ёпди. Бу ҳақда Al Jazeera хабар берди.
Исроил ҳужумлари 13 июнь куни эрта тонгда ҳарбий ва ядровий объектлар ҳамда турар жой ҳудудларига қаратилган. Ўшандан бери Эрон Исроил бўйлаб ракета зарбалари тўлқини билан жавоб қайтарди.
Тўхтатилган ва қайта йўналтирилган рейслар рўйхати:
Яқин Шарқнинг энг йирик авиакомпанияси Emirates 15 июнгача Ироқ, Иордания, Ливан ва Эронга парвозларни бекор қилганини маълум қилган. Жума куни амалга оширилиши керак бўлган бир нечта рейс ва шанба куни Теҳронга амалга ошириладиган битта рейс авиакомпания сайтида бекор қилинганлар рўйхатига киритилган.
Мамлакатнинг миллий авиаташувчиси ва Яқин Шарқдаги энг йирик авиакомпаниялардан бири бўлган Qatar Airways минтақадаги ҳозирги вазият туфайли Эрон ва Ироққа парвозларни вақтинча бекор қилганини маълум қилган. Шунингдек, 14 июнгача Дамашққа рейслар бекор қилиниши ҳам айтилган.
Исроилнинг El Аl Airlines авиакомпанияси Исроилга ва ундан парвозларни тўхтатганини ва баъзи самолётларини мамлакатдан олиб чиқиб кетаётганини айтди. Компания рейслари шанба ва якшанба кунлари кечқурун амалга оширилиши керак бўлган мижозларга аэропортларга бормасликни ва парвозлар ҳолати тўғрисидаги маълумотларни кутишни тавсия қилган.
Исроилнинг арзон авиаташувчиси Israir 15 июнгача Исроилга ва ундан барча рейсларни бекор қилганини ва Тель-Авив аэропортидан самолётларини эвакуация қилаётганини айтган.
Исроилнинг Аrkiа авиакомпанияси 14 июнга қадар барча рейсларни бекор қилган.
Fly Dubai ёки Дубай авиация корпорацияси бюджет ташувчиси Амман, Байрут, Дамашқ, Эрон ва Исроилга парвозларни тўхтатганини ва бошқа бир қатор рейслар бекор қилингани, йўналишлари ўзгартирилгани ёки жўнаш аэропортларига қайтарилганини эълон қилган.
Turkish Airlines ва бошқа турк операторлари 16 июнгача Эрон, Ироқ, Сурия ва Иорданияга парвозларни бекор қилди, деди Туркия транспорт вазири Абдулқодир Ўролўғли баёнотида.
Бирлашган Араб Амирликларининг Etihad Аirways авиакомпанияси Абу-Даби ва Тель-Авив ўртасидаги иккита рейсни бекор қилгани ва яна тўртта рейснинг учишини кечиктирганини айтди.
Etihad ва Turkish Airlines авиакомпаниялари ҳам баъзи рейсларни Озарбайжоннинг Боку шаҳрига йўналтирди, деб хабар бермоқда Ҳайдар Алиев номидаги халқаро аэропорти.
Туркиянинг Pegasus Airlines авиакомпанияси 19 июнгача Эронга, 16 июнгача Ироқ ва Иорданияга парвозларни бекор қилган. Компаниянинг баёнотида айтилишича, у Ливанга парвозларни фақат кундуз кунлари амалга оширади.
Германиянинг энг йирик авиакомпанияси Lutfhansa Тель-Авив ва Теҳронга 31 июлгача, Амман, Эрбил ва Байрутга 20 июнгача барча рейсларни тўхтатган. Компания ўз баёнотида “ҳозирча Эрон, Ироқ ва Исроил ҳаво ҳудудидан” ҳам қочишини қўшимча қилган.
Мамлакатнинг миллий авиаташувчиси Аir France Исроил ҳаво ҳудуди ёпилганидан сўнг Тель-Авивга ва у ердан “кейинги огоҳлантиришгача” парвозларни тўхтатган.
Италиянинг флагман авиакомпанияси Itа Аirways Тель-Авивга парвозлар тўхтатилишини 31 июлгача узайтирган.
Нидерландиянинг Аir France авиакомпанияси билан ҳамкорликдаги КLМ авиакомпанияси Тель-Авивга камида 1 июлгача барча рейсларни бекор қилди, деб хабар бермоқда Нидерландиянинг АНП ахборот агентлиги.
Ирландиянинг Rayanair арзон авиакомпанияси 31 августгача Тель-Авивга ва у ердан учадиган рейсларни бекор қилган.
Lutfhansa’га тегишли ва Швейцариянинг миллий авиаташувчиси бўлган SWIСС авиакомпанияси Тель-Авивга парвозларни 25 октябргача, Байрутга эса июль ойи охиригача тўхтатган.
Грециянинг Аegean Airlines авиакомпанияси Тель-Авивга ва у ердан 12 июль куни эрта тонгдаги рейсгача бўлган барча рейсларни, шунингдек, 28 июнь куни эрталабки парвозлар орқали Байрут, Амман ва Эрбилга ва у ердан барча рейсларни бекор қилган.
LОТ Polish Airlines авиакомпанияси Эрон ҳаво ҳудудидан Осиёга парвозлар учун фойдаланмаслигини маълум қилган.
Венгриянинг Wizz Air бюджет авиакомпанияси Тель-Авивга парвозларни тўхтатган. Яқин 72 соат ичида минтақадаги ёпиқ ҳаво ҳудудидан таъсирланган рейсларни қайта йўналтирди, дейилади унинг Кипрдаги журналисти орқали берган баёнотида.
Руминиянинг байроқ ташувчиси Таrom Тель-Авив, Байрут ва Амманга барча тижорий рейсларни 16 июнгача тўхтатган.
Латвиянинг АirBaltic авиакомпанияси Тель-Авивга 23 июнгача бўлган барча рейслар бекор қилинганини маълум қилган.
Европа ва Шимолий Америкадаги парвозлари учун Эрон устидан учиб ўтувчи субконтинентнинг байроқ ташувчиси Air India бир нечта рейслар, жумладан Нью Йорк, Ванкувер, Чикаго ва Лондондан парвозлар йўналтирилаётганини ёки ўз манзилига қайтарилганини айтган.
Россиянинг “Аэрофлот” авиакомпанияси Москва ва Теҳрон ўртасидаги рейсларни бекор қилган. Авиакомпания баёнотида айтилишича, Дубай, Абу-Даби, Доҳа ва Малдив оролларига парвозлар Покистон ҳаво ҳудуди орқали қайта йўналтирилган.
АҚШнинг Delta Аir Lines авиакомпанияси 31 августгача Нью Йоркдан Тель-Авивга парвозларни тўхтатганини айтган. Авиакомпания, шунингдек, пайшанба куни Нью Йорк—Тель-Авив йўналиши бўйича парвозни ортга қайтарди, деб хабар бермоқда Flightрадар.
АҚШнинг йирик авиакомпанияси United Airlines Тель-Авивга UАL84 рейси парвоздан сўнг Нью Йоркка қайтганини тасдиқлади, Нью Йоркдан парвоз ҳам бекор қилинган. Авиакомпания август ойининг охиригача Исроилда ўз фаолиятини тўхтатганини маълум қилди, деб хабар бермоқда Исроил ОАВ.
Британиянинг Easyjet авиакомпанияси Тель-Авивга барча рейсларни камида 31 июлгача тўхтатганини эълон қилган.
Изоҳ (0)