“Ўзавиация” агентлиги Flyаdeal авиакомпаниясига Ўзбекистонга мунтазам авиақатновларни амалга ошириш учун рухсатнома берди. Бу ҳақда агентлик матбуот хизмати хабар бермоқда.
Бу Ўзбекистон ва Саудия Арабистони ўртасида ҳаво қатнови тўғрисидаги ҳукуматлараро битимга асосан берилди. Парвозлар А320 самолётида амалга оширилади.
Авиакомпания Жидда—Тошкент—Жидда, Мадина—Тошкент—Мадина ва Жидда—Наманган—Жидда йўналишларида мунтазам қатнайди.
Шавкат Мирзиёевнинг 2022 йил августида Саудия Арабистонига давлат ташрифи давомида икки мамлакат транспорт идоралари томонидан фуқаро авиация соҳасида англашув меморандуми имзолангани ҳамкорликнинг янги босқичини бошлаб берди. Мазкур ташриф давомида транспорт, хусусан, ҳаво транспорти соҳасида икки мамлакат ўртасидаги мавжуд алоқаларни янада кенгайтириш, шаҳарлар ўртасида мунтазам авиарейсларни ташкиллаштириш бўйича муҳим келишувларга эришилди.
2023 йил декабрида Ўзбекистон ва Саудия Арабистони шаҳарлари ўртасида мунтазам авиақатновлар сони ҳафтасига 70 тага етказишга келишилди.
2024 йил майида Ўзбекистон шаҳарларидан Саудия Арабистони шаҳарлари ўртасида мунтазам парвозлар сони ҳар бир томондан 50 тагача кўпайтиришга келишиб олинди ва эришилган келишувларни тасдиқлаш мақсадида меморандум имзоланди.
Изоҳ (0)