Тошкент шаҳридаги VI—XV асрларга оид “Хонободтепа” археология ёдгорлигига 31,5 миллиард сўмлик зарар етказилди. Бу ҳақда Бош прокуратура матбуот хизмати хабар берди.
Маълум қилинишича, бу прокуратура органлари томонидан маданий мерос агентлиги билан ҳамкорликда тарихий ёдгорликларни муҳофаза қилиш ва сақлаш бўйича ўтказилган назорат тадбирларида аниқланган.
“Хонободтепа” археология ёдгорлиги ҳудуди орқали ихтисослашган корхона томонидан 257 метр узунликдаги канализация қувури ўтказилиб, ёдгорликнинг 961 метр куб қисмига 27 миллиард сўмлик зарар етказилган. Бундан ташқари, ушбу корхона томонидан ёдгорликнинг яна 160 метр куб қисми экскаватор ёрдамида ковланиб, 4,5 миллиард сўмлик зарар етказилган.
Айни пайтда ҳолат юзасидан корхона мансабдор шахсларига нисбатан жиноят иши қўзғатилган бўлиб, назорат тадбирлари давом эттирилмоқда.
Мазкур жиноий қилмиш қонунчиликка асосан оғир жиноят ҳисобланиб, айбдор шахсларга нисбатан 7 йилгача озодликдан маҳрум қилиш жазоси қўлланилади.
Май ойида Тошкент вилоятида маданий мерос объектларини муҳофаза қилишга қаратилган назорат тадбирлари ўтказилганда 13 та ёдгорликка 342 миллиард сўм зарар етказилгани аниқланганди. Ҳолат юзасидан жиноят ишлари қўзғатилганди.
Изоҳ (0)