2025 йил 29 июнь тонгида Лас-Вегасдаги “Т-Mobile” аренада UFC 317 турнири бўлиб ўтди. Кечанинг асосий жанги — енгил вазн тоифасидаги бўш турган чемпионлик камарини қўлга киритиш учун ўтказилди.
Мазкур вазн тоифасида камар Ислом Махачевнинг юқори дивизионга ўтиши ортидан вакант ҳолатга келиб қолган эди. Финал жангида асли грузиялик бўлиб, Испания шарафини ҳимоя қилаётган Илия Топурия ва бразилиялик собиқ чемпион Чарльз Оливейра майдонга тушди ва 1 раунднинг ўзида ғалаба қозониб, енгил вазн тоифасида янги чемпионга айланди.
Жанг ҳар икки спортчининг фаоллиги билан бошланди. Бироқ биринчи раунднинг ўзида Топурия кучли зарба йўллаб, рақибининг юзига жароҳат етказди. Оливейра клинчга киришга уринди, бироқ Топурия уни ерга ётқизиб, қисқа вақт давомида назорат остида ушлаб турди. Жангчилар яна тик ҳолатга қайтгач, Илия олдинга интилиб, кучли ён зарбалар билан ҳужумга ўтди. Оливейра эса унга апперкот билан жавоб қайтарди.
Аммо навбатдаги ҳужум жанг тақдирини ҳал қилди. Топуриянинг чап қўли билан йўллаган зарбаси тўғри нишонга теккач, Оливейра ерга қулади. Илия ерда унга яна иккита зарба берди, бироқ Оливейра аллақачон нокаут ҳолатида эди.
Шу тариқа, Илия Топурия UFC енгил вазн тоифасининг янги чемпионига айланди ва промоушен тарихида икки вазн тоифасида чемпионлик камарини қўлга киритган ўнинчи жангчига айланди.
Изоҳ (0)