Ижтимоий тармоқларда Тошкент шаҳар ҳокими Шавкат Умурзоқовнинг дўконлардан бирида ўтказган “рейд”и акс этган видео тарқалди. Видеотасвирда ҳоким яшикдаги мевалар айниганини айтиб, тадбиркор ва атрофидаги ишчи гуруҳ вакилларига танбеҳ берган. Бу ҳолат жамоатчилик муҳокамаларига сабаб бўлди.
Тошкент шаҳар ҳокимлиги хабарига кўра, жорий йилнинг 3 июль куни Шавкат Умурзоқов бошчилигидаги ишчи гуруҳ Юнусобод тумани “Собиробод” маҳалласидаги муаммоларни ўрганган. Жараёнда ноқонуний қурилмалар, чиқинди ташлаш билан боғлиқ масалалар, савдо объектларида санитария қоидаларига амал қилмаслик ҳолатлари аниқланган.
“Бундан ташқари, дўконларда айниган сабзавот ва мевалар сотилмоқда, бу ҳам қатъий назоратни талаб қилади”, дейилади ҳокимлик хабарида.
Видеода ҳоким озиқ-овқат дўконларидан бирида ўриклар солинган яшикни қўлига олиб, маҳсулот истеъмолга яроқсиз эканини айтган.
“Булар аҳолига нима сотяпти? Қани СЭС, қани Солиқ? Бу ёққа кел. Қаёққа қараяпсан? Одамлар буни еб, эртага заҳарлансинми? Олмаларни тагига сувлари чиқиб кетган. Кўр, моғорлаб ётибди. Дўконда ёнғин хавфсизлиги таъминланганми? Қани МЧС? Нимага сенлар юрмайсанлар? Ухлаб ётибсанлар? Бу ерни дўкон эмас, “склад” қилиб ташлашган”, деган ҳоким.
Видео юзасидан фикр билдираркан, журналист Анора Содиқова ҳоким колхоз раҳбари эмаслигини, тадбиркор билан қўпол муомала қилиш унга ярашмаслигини айтиб ўтган.
“Ўзбекистон пойтахти бўлган Тошкент ҳокимининг муомаласини қаранг: Бяҳке, нима бу? Қаққа қаравоссан? Умуман, ҳокимнинг МЧЖ эгасига ёки сотувчига шундай муомала қилишга, маҳсулотини олиб қўполлик билан улоқтиришга ҳақ-ҳуқуқи борми? Аслида, биз ҳокимга Тошкентга қараяпсанми ўзи, деб ўдағайлашга ҳақлимиз. У биз учун хизмат қилиши керак. Шунинг учун ҳам солиқлар тўлаяпмиз”, деб ёзган журналист.
Блогер Нурбек Алимов Telegram’даги каналида ҳоким “рейд”и бўйича ўз мулоҳазаларини ёзиб қолдирди.
“Тошкент шаҳар хокими активистлик қилмоқда. Шу ҳокимимиз электросетларга бориб рейд қилса, свет ўчганда “авария бўлди”, деб бошқа умуман маълумот бермайдиган ТЕТКларга бориб “қаерда ростан ҳам авария бўлди, қаерда шунчаки тежашяпти”, деб рейд қилиб юрса бўларди. Ну албатта чириган ўрик рейди ҳам муҳим, лекин одамларнинг, халқнинг ҳам чириган ўрикни олиш ёки олмасликка етадиган ўз калласи бор. Автобусларга чиқиб олиб, жамоат транспортидаги муаммоларни ўргансин. Йўлларда пиёдаларга қандай шароит борлигини билиш учун пиёдага айланиб олиб рейд қилсин. Жаҳл билан яшикчани ирғитиб, нима бу дейиш эса шахсан менга забавно туюлди”, дея қайд этган блогер.
Видео тўғрисида фикр билдираркан, блогер Умид Ғофуров шаҳарда бошқа муаммолар ҳам борлигини эслади.
“Тошкент шаҳар ҳокими шахсан дўконма-дўкон юриб чириган мева бор–йўқлигини текширяпти экан. Шаҳар ҳокимини режаларида: асфалт қилинмаган йўллар ва бетон қилиниб дабдаласи чиққан тротуарлар, йўл ўтказгичларида ишламайдиган лифтлар, ўрнатилмаган чиқинди челаклар, ишламайдиган дренаж тизими ва яна +100500 та ўз зиммаларидаги муаммоларни текшириш бормикан? Бизда тизим умуман ишламаслигини яққол мисоли бу. Истаган жойга бориб 1000 та қоидабузарлик топиш мумкин. Керак бўлса, ўша давлат идораларида ҳам. “Ёнғин хавфсизлиги қаерга қараяпти” деган ҳоким ҳаёт учун хавфли бўлган давлат идоралари биноларига кирмаганлиги аниқ. Поликлиникалардан тортиб, маҳалла йиғинларигача. Киришга қўрқади одам”, деб ёзди у.
Экология вазири маслаҳатчиси Расул Кушербаев Telegram каналига мазкур видеони жойлаб: “Тошкент шаҳар ҳокими дўконда. Тадбиркор синдиёв”, дея пост қолдирган.
Журналист Муҳрим Аъзамхўжаев “Юнусободда шу чириган ўрик ва олмадан ҳам бошқа, каттароқ муаммолар бор эди лекин”, дея фикр билдирган. Умуман олганда, ижтимоий тармоқлардаги саҳифаларга жойланган видео остида минглаб изоҳлар қолдирилмоқда.
Маълумот учун, 2023 йил 23 март куни “Ўзавтосаноат” раиси лавозимида ишлаб келган Шавкат Умурзоқов Тошкент шаҳар ҳокими вазифасини бажарувчи этиб тайинланди. 2024 йил 3 апрелдан расман пойтахт ҳокими лавозимига тасдиқланди. Шу билан бирга, Умурзоқов жорий йил 2 июлдан Юнусобод тумани “Туркистон-53” сайлов округида бўшаб қолган депутатлик ўрнига ЎзЛиДеПдан депутат этиб ҳам сайланган.
Изоҳ (0)